Nunavimmi atuartut ilinniartitsunik persuttaasarnerat ingasatsippoq

Atuartut ilinniartitsisuminnik persuttaasarnerat atuartunut kinguneqartarsimanngilaq persuttaanermi kingorna ullut arlaqartut qaangiukaanga atuariartortarsimagamik. Ilinniartitsisut persuttarneqarnermi kingorna atuarfimmit sulinngiffeqartariaqartarsimapput soraarlutilluunniit.

Puvirnituq mi ilinniartitsisut persuttarneqartarnerat Nunavimmi kisiartaanngilaq, Nunavimmi atuarfinni atuartut persuttaasanerat ukiuni kingullerni amerlisimapput. Atuarfinni aserorterisarnerit akornusersuisarnerit atuaqatinillu immikkoortitsisarnerit amerlaqisut naammattoorneqartarput, nalinginnaasumillu qanoq iliuuseqartoqarneq ajortoq ilinniartitsisut arlaqartut isumaqarput. Nunavimmi atuarfiit aqutsisuisa ilinniartitsisunik tapersersuinerunissaat Nunavimmi ilinniartitsisut peqatigiiffiata piumasaraa.

Ilinniartitsisut atuarfinni aqutsisunit ataqqineqanngillat, Nunavimmi ilinniartitsisut peqatigiiffiata siulittaasua Nunatsiaq Online-mut oqaluttuarpoq.