Nunavimmi anorisaatinik innaallagissiuutinik misileraasoqalerpoq
Nunavimmi nunaqarfinni innaallagissamik atuineq qaffakkaluttuinnarpoq, internetimik fjernsynimik allanillu innaallagissatortunik atuineq annertusiartuinnarmat.
Misileraaneq siulleq Kangiqsualujjuarmi Ungavap sineriaaniittumi 2011-mi pissaaq. Hydro-Quebécip pilersaarutini qanittumi Kuujjuarmi ataatsimiinnermi saqqummiuppai; Nunaviup nunaqarfiisa 14-inusut ilaai arfineq marluk anorisaatinik innaallagissiuuteqarfiusinnaasutut piukkunneqarput. Misileraanernili teknologii nutarsarneqartussaassaaq. Nunaqarfinni taakkunani sanaartornissamut maanna tyskit australiamiullu suliffeqarfii suliarinnikkusullutik nalunaarsimapput.
Kitty Annanack Kangiqsualujjuarmi borgmesteri Postmedia Newsimut oqarpoq anorisaatit innaallagissiuutit piniagassanut ajoqutaassappata nunaqarfiup piumassanngikkai. Innaallagissiorfiulli oqaaseqartartuata Steve Fulham-ip Kuujjuarmi ataatsimiinnermi neriorsuutigaa pinngortitamut uumasunullu sunniutaasinnaasut misissorluarneqaqqaassasut.
1990-ikkunni Kuujjuarmi anorisaatit innaallagissiuutitut atorneqarlutik misilittarneqarput, anoreqarpallaarnera, siku, apullu pissutaallutik atorsinnaasimanatik. Innaallagissiorfiit isumaqarput maanna teknologii pitsanngornerusimasoq taamaalilluni nunani issittuni anorisaatit innaallagissiuutitut atorneqarsinnaanngorsimassallutik.
Pilersaarutit malillugit ingerlasoqassappat Kangiqsualujjuarmi anorisaatit 2015-imi innaallagissiorlutik aallartissapput.