Nunavik qilalukkanut killilersuiffiulerpoq

Nunavimmi qilalugarniarnermut sukannernerusumik killilersuisoqalerpoq.

Nunavimmi qilalukkanik piniarnermut killilersuineq nunatsinnisulli aaqqissugaasoq juunip aallaqqaataaniit atuutilerpoq, tassa ukiumut qilalugartassiissutit qaangersimagaanni, ukiup tullissaani pisassiissutinit peerneqarsinnaalersut, Nunavimmi aalisarnermut pisortaqarfik nalunaarpoq.

Nunavimmiut ukioq manna katillugit 170-inik qilalugartassinnerput. Hudsonip kangerliumarnganut 135-it, James Baymut Long Islandimullu 35-it, Ottawa Islandimullu tallimat pisassatut agguaanneqarput.

Hudson-ip kangerliumarngani pisassat 135-inut ikilineqarput qilalukkat tasamaniittut ikileriangaatsiarsimasut biologinit oqaatigineqarmat.

Oqaatigineqarporlu qilalukkat tasamaniittut killilersugaanermikkut amerlassusissartik ukiut 100-it qaangiuppata aatsaat angoqqissinnaalerumaaraat, Nunatsiaq news taama allaaserinnippoq.

Nunavimmi qilalugarniarneq pillugu malerugassanik sukaterinerup kingorna qilalukkanit tunisassiaqartarneq aamma inerteqqutaalerpoq.