Nunavik pillugu Kuujjuarmi ataatsimeersuarneq iluaqusiivoq

Katimajiimi ataatsimeersuaqataasut isumaqatigiissutigaat Makivimmi Kativimmilu naalakkersuisut ataatsimeersuartitsinertik iluatsitsilluarfigigaat. Canadami naalagaaffeqatigiit tamarmik ikorfartuiniarlutik piumassuseqarluaraluartut ataatsimeersuarnermi Quebeckip naalakkersuisui taakkuupput aningaasaliissuteqarnerpaasut. Ataatsimeersuarnerup naammassilernerani Quebeckimi naalakkersuisut danskit aningaasanngorlugit 950 millioner koruuninik immikkut aningaasaliipput. Meeqqanik kinguaassiuutitigut kanngutsaattuliortarnerit, sakkortuumik inuttut ajornartorsiuteqarnerit millisarnissaannut imminortartullu ikilisarnissaat siunertaralugu suliniuteqarnissanut aningaasaliissutit atorneqarniarput. Saniatigut Canadami naalagaaffeqatigiit 100 millioner koruunik aningaasaliipput. Aatsitassarsiorfiunikut 18-it salinneqarnissaannut, Nunavimmi internetip ineriartortinnissaanut nutaanil 250-nik illuliornissamut mittarfeeraliornernullu taakku atorneqassapput. Nunavimmili ataatsimeersuarnermi angusat annersaraat nunap immikkoortuini naalakkersuisut isumaqatigiissutigimmassuk suleqatigiinnerusariaqarlutik. – Nunavik uppereqqilerparput kiisalu tusarnaarnissatsinnut suleqatigiinnissatsinnullu piumassuseqarnerulerluta, taama oqarpoq Canadami naalagaaffeqatigiinni ministeriuneq Jean Charest.