Nunavik: Maaniinnaq aalakoortut akiliisinneqartarput
Qaammat naaqqammerpoq, inuillu aqqusinerni aalakkuttut, pingaartumik maani Nuup qeqqani, takussunarsaataapput. Akitsinni Kuujjuarmi innuttaasut kikkut tamarmik takkuanni - aqqusiniinnarni allaniluunniit inuit ornittagaanni aalakoortut - akiliisinneqartalersimapput, tamannalu pinerluttulerinermut inatsimmik unioqqutitsinnginnissamut pinaveersaatitut eqqunneqarsimasoq, Nunatsiaq News allaaserinnippoq. Nunavimmi aalakoortut sumi tamaani angalaartut takuneqartut akiligassarsisinneqartarput, kommunimut akileriartugassaannik.
- Aalakoortunik akiliisitsisarnerput, inuiaqatigiinni toqqissisimanerulersitsiniarnermik isumannaallisaanermillu tunngaveqarpoq, aalakoortummi pinerluuteqarsinnaasarput eqqartuussiviit pineqaatissiinerannik kinguneqartumik. Inuit aalakoortut ajortuliortinnagit kikkut tamarmik takkuanni aalakoorsimagaangata pinaveersaartitsiniutigalugu akiligassittarpavut, Kativiup politiivisa pisortaat Aileen MacKinnon oqarpoq.
Assersuutigalugu Kuujjuarmi inuit 164-it Puvirnertuq-milu 213-it (Kuussuarmi Puernittoq: tipittoq) maaniinnaq aalakoornertik pillugu ukiuni kingullerni marlunni akiligassinneqarsimapput.
