Nunatta USA-mit ilisimaneqarnera annertusivoq

Al Gorep avatangiisit pillugit filmiliaata nunarput pillugu tuniniaasut USA-mit takornarialerinermik iluaquserpai.
aggustip 07-at 2007 15:35

Kalaallit Nunaata USAmi ilisarisimaneqarnera alliartorpoq. USA-mi angalatsitsiviit Nunarput nalunnginnerulerpaat. Nini Billmann, Nunatsinni Takornariaqarnermi Inuussutissarsiornermilu Siunnersuisoqatigiinneersoq qaammatini 15-ni kingullerni USA-mi Nunatta takornariarfissatut tuniniarneqarnerani suliaqarsimavoq. Taannalu isumaqarpoq, Nunatta ilisariartorneqarnera alligaluttuinnartoq Al Gorep avatangiisit kiisalu silaannaap pissusaanik filmiliaa saqqummereersorlu.

Nunatsinni Takornariaqarnermi Inuussutissarsiornermilu Siunnersuisoqatigiinneersoq, 30-nik ukiulik Nini Biilmanni, amerikamiumik nunatsinnut soqutigisaqarpaluttumik oqaloqatiginnittoq tassa taavannguaq tusaavarput. Nini Biilmann takornarialerinerup silarsuaani taaneqartarpoq, MICE koordinatorimik, tassa ataqatigiissaarisutut. Nunarsuamilu takornariartitsivinnut assigiinngitsunut nunarput takornariarfissatut tuniniarniarlugu angalasarpoq. Angalaniartunik angalatsitsiviit aaqqissuussisartut ataatsimeeqatigisarpai, Nunarpullu pillugu ilisimatitsissutissanik oqalugiartarluni.

Aallaqqaammut Nunatta avataanit ilisimaneqarnera annertugisassaanngilaq, vicepræsidentiusimasulli Al Gorep avatangiisit silaannaallu pissusaanik filmi-liaa ateqartoq; An Inconvenient Truth, toqqaannartumik nutserlugu isumaqartoq; “Piviusoq Aqunneqarsinnaanngitsoq” filmillu taassuma takutinneqarnerata kingorna Nunatta avataaniit ilisimaneqarnera annertuseriarujussuarsimavoq.

Nini Biilmann-ip aamma oqaatigaa;

Amerikamiut, Nunatta sumi inissisimanera kiisalu sermersuup tunuariartornera takussallugu soqutigisaraat aamma silaannaap allanngornerata nassatarisaanik kalaallit inuuniarnerminni atugaasa qanoq allanngorluinnarsimatiginerat ilanngullugu paasisaqarfigerusuttaraat. Naggataatigut eqqaavaa, Nunatta alianaassutsimigut nunanut allanut naleqqiussassaanngikkaluarluni taamaattoq takornariarfissaqqissutut avammut tuniniarnerani aatsaat sulerujussuaqqaartoqaqqaartariaqartartoq.