Nunatta Sydkoreamut attaveqarnera isumakulunnartoqartippaat
Kuupik Kleistip Korea Kujalliup præsidentiata Nunatsinnut tikeraarneratigut Nunatta nunanut allanut tunngasunut oqaasisssaqarnerulerneranut uppernarsaataanerarpaa. Aamma naak pisortatigoortumik tikeraartoqarneq qallunaanit peqataaffigineqaraluartoq, tassami avatangiisinut ministerip Ida Aukenip aamma kunngissap Frederiup peqataaffigimmassuk, Per Stig Møllerip ernumanartoqartippaa.
- Aatsitassanut tunngatillugu kalaallit namminneq isumaqatigiissusiorsinnaatitaasariaqarput. Nunanulli allanut tunngasunut namminneq oqartussaassuseqalerumanerat eqqarsaamminartuulluni. Nunanummi allanut tunngasunut inatsit tunngaviusoq naapertorlugu Dronning-ip akisussaaffigaa, tassalu Kalaallit namminneq nunanut allanut tunngasut namminersuutigisinnaanagit, Per Stig Møller aviisi Berlingske Tidende-mut taama oqarpoq.
Taamaammat Koreamiunit tikeraarneqarneq isumaqatigiissusiortoqarneralu Kalaallit Nunaata Danmarkillu nunanut allanut tunngasunik akisussaaffiisa inissisimanerat ulorianartorsiuleriaannaasoraa.
- Kuupik Kleist-i pikkorilluinnartuuvoq, qanorlu iliuuseqarnini nalunngilluarlugu. Taamammat ima apererusunnarsivoq: Tullisaanimi taava susoqassava? Isumaqatigiissutimmi allat siunissami atsioqatigiissutigineqartaleriaannaapput, taamaalisoqassappallu Itillimi isumaqatigiissusiaq tunngviusumillu inatsisit sipporlugit iliuuseqartoqassalluni, Per Stig Møller oqarpoq.