Nunatta Svalbard-illu akornanni killeqarfeqalerpoq

Nunatta Svalbard-illu imartaata akornanni killeqarfeqalernissaa ukiorli februaarip 20-iani københavnimi danskit norskillu nunanut allanut ministeriisa tassalu Per Stig Møllerip, Jonas Gahr Støre-p kiisalu nunatsinniit nunanut allanut pisortaqarfimmi pisortaasup Inuuteq Holm Olsenip isumaqatigiissusiorfigineqarnera erseqqissaatigaat.

Tassalu ullumikkut danskit folketing-iisa norskillu Storting-iisa isumaqatigiissut taannarpiaq akuersissutigigaat nalunaarutigineqarpoq. Illuatungeriit danskit norskit kalaallillu taama nalunaaruteqareersullu isumaqatigiissut atuuttussanngortinneqarpoq.

Tassalu imaalivoq nunat taakku marluk akornanni immap naqqani nunavimmut atasortaata killinga aalisarfiillu 200 sømilinik avasitsigisumut killeqarfeqalermata.

Danmarkip Norge-llu siusinnerusukkut tamanna pillugu narrutsassimaarutigalugu aaqqiagiinngissutigisarpaat, suliarlu tamanna pillugu marloriarlugu nunat tamalaat eqqartuussivissuanni Haag-imiittumi killeqarfilerngusaanneq aalajangiivigineqartareerpoq.

1933-imi eqqartuussiviup aalajangiivigaa nunarput Danmarkimut atassasoq, qeqertamullu Jan Mayenimut nunalerngusaannermi Norge 1993-mi eqqartuussivimmi piginnittuusussanngortinneqarpoq.