Nunatta siuttuata ukiortaami oqalugiaataa
Naalakkersuisullumi siunniussimasartik iluatsissappassuk aalisarnerup aaqqissuuteqqinneqarnera ukioq 2013-mi inaarsarneqassaaq, tamannalu pissappat aalisartutut nunalerinermillu inuutissarsiornerup nutarsarneqarnissai kikkut tamarmik paaseqatigiillutik ingerlanneqartariaqassapput, nunalerinermullu ataatsimiititaliarsuup ukioq 2014-mi inatsisartut upernaakkut ataatsimiilerpata isumaliuutissiissutissamik pilersitsereersimanissaa siunertarineqarluni.
Isumaliuutissiissutissamilu tassani nunalerinermik inuutissarsiutit imminut akilersinnaasut imminullu napatissinnaasut pilersinneqarnissaat 2015-imut aningaasanut inatsisissamut ilanngunneqartussaasussatut pilersaarutaallutik.
Tamatuma saniatigut puisit amiisa tamarmik tunineqartartalernissaat qulakkeerniarneqassaaq.
- Kinamut aamma Korea Kujallermut attaveqalernigut assorsuaq isumalluarnartoqarput nuannerlutillu. Isumaqarpunga Kangia sammissallugu pissutissaqarluartugut, taakkuuppummi nunarsuarmi naalagaaffiit aningaasarsiornikkut siuariartornerpaasa ilaat, Kuupik Kleist oqarpoq.
Aamma nunatsinni suliffiit, ilinniartitaanerit, sammisassaqartitaanerit atugarissaarnerillu Naalakkersuisutta salliutikkaat Kuupik Kleistip naqissuserpaa. Nunattalu inuusuttortaasa periarfissaminnik atuilluarnissaat, suliffeqarfiillu ataavartut pilersinneqarnissaat siunertarineqarpoq, tassalu nammaqatigiinneq suleqatigiinnerlu aqqutigalugit inuiaqatigiit tamakkuninnga angusaqarnissaat tunngaviussanerarlugit.
Anguniakkat kusanaqisut angussagaanni pisortat nuna tamakkerlugu sanaartortitsinerulernissaat ilaatigut tunngaviginiarneqarpoq.
- Neriuutigaarput Qeqertarsuatsiaat eqqaanni aammalu Killavaat Alannguani aatsitassarsiorfeqalissasoq. Ilumoorpoq nunarput pisuussuterpassuaqarmat, tamakkuli qallorneqanngikkunik atorluarneqanngikkunillu, sumulluunniit iluaqutinngorsinnaanngillat, Kuupik Kleist oqarpoq.
Kuupiullu ukiortaami oqalugiaanni naggaserlugu inuiaqatigiit naleqartitaat isummersorfigaa. Siornatigummi inuiaqatigiit oqalliseqataanerulernissaanik kaammattuutaa akorluarneqarsimaqaaq. Oqalliseqataanerli atorluarunnaarlugu oqqanneq - pingaartumik qinikkat akornanni atugaavallaalersimasoraa.
- Akuersaaruminaappoq naalakkersuinikkut isummersuutiginiakkat pissaaneqarniunnerup sakkortusiartortup ipitittarmagit. Akuersaaruminaappoq isummatik pissutigalugit siooratinneqartassappata. Tamakku oqallinnermut siuarsaataanngillat, Naalakkersuisut siulittaasuat taama naggataatigut naqissusiivoq.
Oqalugiaat tamaat uani isiginnaarsinnaavat: /kl/tv/01012013-kuupik-kleistip-ukiortaami-oqalugiaataa