Nunatta Sinniisoqarfia Københavnimiittoq ukiortaami ilasseqatigiinnissamut qaaqqusisoq

Katillugit inuit 400 missaanniittut qaaqqunneqarsimapput, marlunnillu tulleriinnik aaqqissuussisoqassaaq.

Aaqqissuussinermi siullermi, ministerit, nunat aallartitaat, Danmarkimilu ministeriaqarfinni atorfilittat qullersaasut Kim Kielsenip ukiumut qaangiuttumut qujassuteqarfigalutillugu ukiortaami pilluaqqussavai.

Danskit naalakkersuisui sinnerlugit nunanut allanut tunngasunut ministeri Martin Lidegaard peqataassaaq.

Tamannalu Danmarkimi nalunaaqutaq malillugu nal. 14.00 pissaaq, ilaatigullu Kim Kielsen oqalugiaateqassalluni.

Nalunaaqutaq 16.00-p missaani ukiortaami ilasseqatigiittoqaqqissaaq - tamatumuuna Nunatta suleqatai allat, Nersornaammik tunineqarsimasut kiisalu Namminersorlutik Oqartussat ikinngutigilluagai peqataassallutik.

Naalakkersuisut siulittaasuata oqalugiaateqarnerata saniatigut erinarsoqatigiit Aavaat, Mads Lumholtimit siulersorneqartut, sisamanngornermi ilasseqatigiittoqarnerani aliikkusersuitinneqassapput.

Namminersorlutik Oqartussat aamma tallimanngorpat tusagassiortunik katersortitsiniarput, Kim Kielsen, Demokraatit siulittaasuat Andreas Uldum Atassutillu siulittaasua Knud Kristiansen tusagassiortunit apeqquteqarfigineqarsinnaassallutik.