Nunatta Savalimmiullu nunanut allanut polikkissaattut inatsisissaq assigiingitsunik isummersorfigineqarpoq
Nunatta Savalimmiullu nunanut allanut politikkeqarnissaannut inatsisissatut siunnersuut Folketingimi oqaluuserineqartussaq pillugu naalakkersuisooqatigiit siuttui assigiingitsunik isumaqarput.
Inatsisissatut siunnersuummi naqissusiissoqartussaavoq Kalaallit Nunaat pillugu nunanut allanut isumaqatigiiniarnerni apeqqutini assigiingitsuni Savalimmiunut tunngatillugu nunarput akuersitinneqaqqaartassasoq. Naalakkersuisut siulittaasuata Hans Enoksenip inatsisissatut siunnersuut akuerineqassasoq innersuussutigaa, Aningaasaqarnermut Naalakkersuisoq Josef Motzfeldt isumaqarpoq qulaajaasoqaqqaasasoq.
Inatsisissatut siunnersuut Folketingimi oqaluuserineqartussaq Savalimmiuni naalakkersuisunit iluarineqarpallaangilaq. Inatsisissatummi siunnersuumi ilaatigut allaqqasoqarpoq nunanut allanut isumaqatigiiniarnermi assersuutigalugu Savalimmiut pillugit aaliangigassani nunarput akuerseqataasassasoq inatsisissami siunnersuutigineqarmat. Tassanilu aalisarneq pillugu isumaqatigiiniartarnerni nunani avannarlerni aalisarnikkut suleqatigiiffiit NAFO-p NASCO-llu isumaqatigiinniarfigineqartarnissaat eqqarsaatigineqarnerupput.
Soorlu aamma Kalaallit Nunaat ilinniartitaaneq pillugu Canadamut isumaqatigiissuteqarniarpat pisariaqassanani savalimmiormiunut apereqqaarnissaq.
Savalimmiormiut naamagittaalliuteqarnerat aningaasaqarnermut naalakkersuisup Josef Motzfeldt-ip tapersersorlugu ullumi oqaaseqarpoq. Josef Motzfeldt oqarpoq inatsisissatut siunnersuut misissuataarneqaqqaartariaqartoq, inatsisissap imarisaa Danmarkip Savalimmiut nunattalu paaseqatigiissutiginissaata tungaanut. Taamaalilluni Atlantikup Avannaani Suleqatigiit Josef Motzfeldt-imit taperserneqarput. Taakku isumaqarput inatsisissatut siunnersuut tunuartinneqassasoq qulaajaasoqarnissaata tungaanut.
Hans Enoksenilu assigiingitsunik isummernertik naalakkersuisooqatigiinnermut sunniuteqassanngitsoq Josef Motzfeldt isumaqarpoq, oqaloqatigiilluartoqartariaqartorlu oqaatigalugu.
