- Arctic Fivemi Issittumilu Siunnersuisoqatigiinni nunatta inissisimanerata sammineqarnerunissaa kissaatigigaluarparput, oqallinnermimi Kalaallit Nunaata sammineqarnerunissaa pingaaruteqarpoq, Justus Hansen oqarpoq.Assi: Nils Baum/Bureau for Inatsisartut

TAKSØEP NALUNAARUSIAA Nunatta sammineqarnerunissaa Justusip ujartorpaa

Taksøep nalunaarusiaa Inatsiartut nunanut allanut tunngasunut sillimaniarnermullu ataatsimiititaliaata siulittaasuata Justus Hansenip naatsorsuutigisaanut naapertuutinngillat. Nunatta inissisimanera Danmarkip nunanut allanut tunngasuni politikkiani ersarinerusariaqaraluartoq, taanna isumaqarpoq.

 - Nassuerutigissavara tupigusukkama. Nalunaarusiap imartunerusimanissaa naatsorsuutigigaluarakku, Inatsisartunut ilaasortaq Demokraatineersoq Justus Hansen oqarpoq.

Danskit nunanut allanut tunngasunut  ministeriata Kristian Jensenip nunatsinnut neriorsuutigisimasaa eqquutsinneqanngitsoq, Justus Hansenip erseqqissaatigaa.

Aamma atuaruk Savalimmiut nunanut allanut tunngasumik namminneq nalunaarusiorusupput

- Danskit nunanut allanut tunngasunut ministeriata ivertinneqarnermini oqaatigaa Nunarput ataqqillugu issittumi suleqatigiinnermi peqataatinnerusalerniarlugu, Justus Hansen oqarpoq, nangillunilu:

- Taava Taksøe-Jensen 128-nik qupperneqartumik nalunaarusiortinneqarpoq, tassanili Issittoq nunarpulluunniit pillugit annerusumik allaaserineqanngillat, Justus Hansen, nunanut allanut naalakkersuisoq Vittus Qujaukitsoq isumaqatigalugu, oqarpoq.

Aamma atuaruk Vittus: Taksøep nalunaarusiaa annilaarnarpoq

Aamma atuaruk Qujaukitsup naalagaaffeqatigiinnermi kissaatini saqqummiuppai

Taksøep nalunaarusiaa pillugu naalakkersuisoq KNR-imut emailikkut ilaatigut ima akissuteqarpoq:

- Naalakkersuisut, Namminersornermut inatsit, Kalaallit Nunaata nunanut allanut politikkiata iliuusissaa, Itillermilu isumaqatigiissummi Kalaallit Nunaata akuliutsinneqarnissaa pillugu nalunaarusiami allaaserineqanngillat. Soorlu aamma Issitoq pillugu Danmarkip politikkissaani eqqaaneqanngitsut, nunanut allanulluunniit politikkikkut ingerlatsinermut atatillugu. Tassanimi qallunaat nunanut allanut tunngasunut sullissiviata kalaallit soqutigisaasa saqqummiunnissaat akisussaaffigigaluarpai, Vittus Qujaukitsoq allappoq.

Aamma atuaruk Aleqa isornartorsiuisoq – Espersen nersuivoq

Naalagaaffeqatigiit nunanut allanut tunngasunut politikkianni nunatta sumi inissisimanera Justus Hansenip ujartorpaa.
Issittumimi suliaqarnerunissaq nalunaarusiami kaammattuutigineqarpoq.

- Arctic Fivemi Issittumilu Siunnersuisoqatigiinni nunatta inissisimanerata sammineqarnerunissaa kissaatigigaluarparput, oqallinnermimi Kalaallit Nunaata sammineqarnerunissaa pingaaruteqarpoq.

Nunanut allanut naalakkersuisup Vittus Qujaukitsup Savalimmiunilu nunanut allanut ministerip Poul Mikkelsenip Peter Taksøe-Jensenip nalunaarusiaa pingasunngornermi misissuataarpaat. Savalimmiormiut kalaallisulli nalunaarusiamik isorinneqaat.

Vittus Qujaukitsoq radioavisimut nalunaarpoq, nalunaarusiap imarisaa tamaat, tassanilu innersuussutit, misissuataaqqaartinnagit, tassunga tunngasumik oqaaseqaqqinniarnani.

Aamma atuaruk Ilisimatooq: Nalunaarusiaq Kalaallit Nunaannut periarfissiilluarpoq

Aamma atuaruk Issittumi kajumissutsimik upajungaarsimasoqarnissaq danskinit taperserneqarpoq

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat