Nunatta qeqqaneersut tusarnaartitsilersut

Nuummi Hans Egedep oqaluffiani juullimut tusarnaartitsineq ukiormanna qeqqani erinarsoqatigiinnit peqataaffigineqassaaq. Tusarnaartitsineq KNR-mi toqqaannartumik aallakaatinneqassaaq.
Allattoq Noah Mølgaard
decembarip 09-at 2012 07:39

Hans Egedep oqaluffiani tusarnaartitsinermi siullerpaamik qeqqani erinarsoqatiginnik peqataasoqarnera kingulliugunanngilaq. Taassuma saniatigut aamma tupaallaatissartaqalaarpoq.

Pisarneq malillugu tusarnaartitsineq marloriarluni pissaaq. Siulleq nalunaaqutaq marlup qeqqa aallartissaaq aappaalu nalunaaqutaq sisamanut aallartittussaq KNR TV-mi radiomilu toqqaannartumik aallakaatinneqassaaq.

- Eqqarsaataavoq siunissami juullimut tusarnaartitsisarnissani avataaniit peqataasoqartarnissaa, Nuummi ilagiit sinniisaanni siulittaasoq Niels Olsen KNR.gl-mut oqarpoq.

Erinarsoqatigiit qeqqaneersut tassaasut Noqarteq Sisimiuniit, Inuusuit nipaat Maniitsumiit aamma Kangaamiuni erinarsoqatigiit Nuummiit peqataasussat saniatigut tusarnaartitseqataassapput taakkulu ataatsimoorlutik aamma atussavaat ’Juullimi inuusoq meeraq’ tassanilu erinniorlunilu taalliortoq Tønnes Kreutzmann aqutsisuussaaq.

Juullimi tusarnaartitsineq nipilersuutit, erinarsoqatigiinnerit tussiaqatigiinnerilli atorlugit ingerlasussaq nalunaaquttap akunnerata aappaa avillugu sivisussuseqassaaq.

- Aamma tupaallaatissartaqalaarumaarpoq, sunaanersoq tusarnaartitsinermi takujumaarparsi, Niels Olsen oqarpoq.