Nunatta pisuussutai atorlugit nerisassiorneq aallakaatitassiarineqassaaq

Takornariartitsisartut Destination East Greenland aamma danskit filmiliortartut Ace & Ace suleqatigiillutik tv-kkut aallakaatitassianik arfinilinnik ukioq manna aappaagulu suliaqassapput. Pilersaarutigineqarpoq igasoq sineriak tamakkipajaarlugu assiliisulerluni angalatinneqassasoq, angalanerminilu tikitamini pisuussutit uumassusillit atorlugit nerisassiortassaaq.

Nerisassiornermi oqariartuutit qiterissavaat, inuussutissat Kalaallit Nunaanni pineqarsinnaasut tassaanerat pitsaassutsimikkut nallerneqarsinnaanngitsut aamma tassaasut akoorutissartaqanngitsut.

Takornariartitseqatigiit filmiliortartoqatigiillu siornatigut suleqatigiissutigereerpaat nunarsuarmi timersuutit ilungersunarnersaasa ilaat, Arctic Team Challenge, Tasiilami eqqaanilu ukiuni arlalinni ingerlanneqartarnikuusoq ukiorli kingulleq aningaasassaaleqineq pillugu pinngitsoortoq.