Nunatta pissarititaanik immitsinnut pilersornerulissaagut
Saarulliit tipaartut uusut qerisumik orsersugassat. Appaliarsuit kivikkat. Nunatsinni sumiiffinnut allanut nuttarneq ileqquusorujussuuvoq, ilitsoqqussanillu qiisagisaqartarneq takornartaanani.
Nunatta pissarititaanik imminut pilersornerunissaq siunertaralugu nioqqutissiarineqarsinnaasunik misissuisuisoqalernera pillugu inuussutissarsiornermut naalakkersuisoq Ove Karl Berthelsen ima oqarpoq.
- Assorujussuaq siunertaq takorlooruminarpoq, uanili takorluuinnarnagu pimoorullugu ingerlanniartariaqalerparput. Tassami mamartuliarpassuagut inuiaqatigiinnut tamanut siaruarsinnaaneri inuussutigisinnaanerilu tamakku pikkoriffigut eqquutsittariaqarput.
- Nunap immikkoortuini misissuisitsineq aallartitarput siunertaqarpoq, paasiniassallugu nunatta pissarititaanik assigiinngitsunik kioqqutissiorsinnaanermut attuumassutillit taputartuunniaratsigit, Ove Karl Berthelsen nassuiaavoq.
Periarfissanik misissuisoqareerpat innuttaasut suleqatigalugit suut tunisassiarilernissaannut pilersaarusiorneq 2010-mi aallartissaaq.
- Pilersaarusiornermi sumiiffinni ataasiakkaani suut nunatta pissarititai assigiinngitsut aallaavigalugit ineriartortitsisoqarnissaanik suleqatigiittoqassaaq, nangippoq.
Nunatsinni nioqqutissiorfiit Arctic Green Food aamma Nuka A/S iluatsippiarsimanngillat.
Suliniarnerup suna maanna allaassutigaa? Aperaarput.
- Imaassinnaavoq suliffeqarfiit tamakku suleqatigalugit alloriartoqartoq aamma imaassinnaavoq inoqarfinni kajumissusilinnik inunnik nassaartugut, taakkulu suleqatigalugit alloriartugut, Inuussutissarsiornermut naalakkersuisoq oqarpoq.
Ove Karl Berthelsenip neriuutigaa misissuinertik alloriaqqinnissamut tunngavissaasunik aappaagu 2010-mi paasissutissiisinnaalerumaartoq suliniutinillu siullernik aallartitsissutaajumaartoq. Najâraq Egedelu ilanngutassiamik suliarinnipput.
