Nunatta pissarititaanik atorluaalluni igasullammak ajugaavoq

32-nik ukiulik Martin Manley ippassaq unnukkut 2005-mimi igasullammattut toqqarneqarpoq, ajugaaninilu sumut atussanerlugu nalugaluarlugu ajugaanini nuannaarutigeqaa.

-Ajugaanera sumut atussanerlugu naluara, kisianni nuanneqaaq, igasut unammersuaarneranni ajugaasoq Martin Manley ulluinnarnilu Nuummi Nipisami igasuusoq oqarpoq.

Igasut unamminerminni tuttup quttoraa atorlugu unammipput. Martin Manley-llu iganermini pingaartissimavaa akussat assigiinngitsut atorluarnissaat amerlasuunillu assigiinngitsunik mamassuseqarnissaat. Unamminermilu igaap mamassusaa pingaarnerpaasarmat nunatsinni pissarititaasut atorluarlugit taanna anguniarsarisimallugu.

Kinguleqqialiamini nunatta pissarititai amerlasuut aamma atorniarsimavai, ilaatigut akugalugit kuannit, paarnat, tikiusaat tupaarnarlu.

- Siullermik oqaatigerusuppara unammisut naligiilluinnaqqissaarmata. Martinnilli ajugaaneranut pissutaavoq, igaavisa sorpassuarnik akoqanngikkaluarlutik mamassusissartik mamassutigeqqissaarmassuk. Piareersarnermini aamma kukkunngiivilluni piareersarpoq, atortussanilu ajunngeqqissaartumik atorlugit, Narsami Inuilimi ittuusoq Esben Toftdahl oqarpoq.

Esben Toftdahl oqaluttuarpoq ukiormanna unammisut pikkorilluinnaqqissaarsimasut, taamaalillunilu unammineq pitsaassutsimigut qaffasissimasoq.

-Unamminerup qaffasinneranut pissutaaqataavoq nunatsinni nerisassaatigut pitsassuusut innimigeqqissaarlugit ataqqeqqissaarlugillu atorneqartarmata, taamaammallu igasunut nunatta pissarititaanik atuineq unamminartuuvoq unamminermilu nalilersuutigineqartarluni, Esben Toftdahl oqaluttuarpoq.

Unammisitsinermi naliliisartut nalilersuutigisarpaat igasoq qanoq piareersarluartiginersoq, igaap naammassineranni ataatsimut mamassusaat, eqqiluisaarneq kiisalu igaat ataatsimut qanoq akeqarsimanersut.

Martin Manley-p kinguleqqiaa Nipisami sassaalliutigineqartartoq igasullammaap oqaluttuaraa.