Asii: Nunatta panivissuisa ilaat toqukkut qimaguppoq

Henriette Rasmussenip politikkikkut sulinermi nunatsinnut pingaaruteqarluinnarsimanera qularutissaanngilaq. Asii Chemnitz Narup taama oqarpoq.

Ilinniartitsisoq tusagassiortorlu Henriette Rasmussen, sivisuumik napparsimareerluni tallimanngormat toquvoq.

Henriette Rasmussenillu politikkikkut sulinermi nunatsinnut pingaaruteqarluinnarsimanera qularutissaanngilaq. Kommuneqarfik Sermersuup borgmesteria Asii Chemnitz Narup taama oqarpoq.

- Nunatta panivissuisa ilaata toqukkut qimagunnerani annaasaq angisoorujussuusoq malugaara, aamma aliatsappunga aamma kiserliummerpunga, Asii Chemnitz Narup taama oqarpoq.

Inuttut pisinnaatitaaffiit pillugit sulivoq

Henriette Rasmussen 1970-ikkunni inuusuttuulluni arnat pisinnaatitaaffii pillugit sorsuuteqarluni aallartippoq taamanikkut Danmarkimi Inuusuttut ataqatigiinnut ilaasortaalluni, arnat atuagassiaat Kilut peqataaffigisarlugit.

- Inuusuttunnguunerminiilli politikkikkut suleqataalerpoq, aamma pingaartitaasa ilaginikuuaat inuttut pisinnaatitaaffiit, minnerunngitsumillu nunap inoqqaavisa pisinnaatitaaffii. Aamma Henriette Rasmussenip siullermik naalakkersuisuunermini meeqqat pisinnaatitaaffii FN-ikkut isumaqatigiissutaasut nunatsinni inatsisartutigoortumik naqissusertillugit atuutilerpai, aamma sulinermini tamatigut arnat angutillu akornanni naligiissitaaneq pingaartippaa, soorlu aamma arnat pisinnaatitaaffii politikkikkut suliniarnerani pingaartinnikorujussuugai, Asii Chemnitz Narup taama oqarpoq, imalu nangilluni:

- Nuannarisarpara oqallikkaangatta nunatsinnilu aamma uagut inuiattut ajornartorsiutitta anigornissaanut iliuusissanik eqqartuigaangatta eqqaasitsissutigiuartarmagu uagut kisitta ajornartorsiutivut nalaatarinnginnatsigit, kisianni nunarsuarmioqatigiinni, minnerunngitsumik nunat inoqqaavisa akornanni ajornartorsiutit taakku piummata, taamaammat nunarsuarmioqataasutut aamma suleqataanissamik nunallu inoqqaavi allat suleqatiginisssaannik pingaartitsisuuvoq, Asii Chemnitz Narup oqarpoq.

Issittormiut akornanni ilisimaneqarluarpoq

Henriette Rasmussenip Issittormiut akornanni suleqataasimanera immikkut aamma eqqaaneqartariaqartoq, Asii Chemnitz Narupip oqaatigaa:

- Canadamullu Alaskamullu angalagaangatta inuit naapitagut apeqqutaat siulleq unaagajuttarnikuuvoq: Henriette Rasmussen qanoq ippa? Suleqataanikuunera eqqaamaneqarpoq, aamma nunatsinniinnaanngitsoq, kisianni nunani allani nunat tamalaat akornanni ataqqisaavoq aammalu nuannaartorineqarluni, Asii Chemnitz Narup oqarpoq.

Henriette Rasmussen Nuup kommunalbestyrelsiani Inuit Ataqatigiinni siullersaalluni ilaasortanngorpoq. Inuit Ataqatigiillu tunuliaqutaralugit arnani siullersaalluni Inatsisartuni ilaasortanngorluni. Inatsisartunut ilaasortaareerluni isumaginninnermut naalakkersuisooreerluni Genevemi ILO-mi ukiut sisamat siunnersortitut sulivoq.

Kultureqarnermut naalakkersuisooreerluni Atuakkiorfimmi pisortaavoq. Tusagassiortutut sulereerluni KNR raatiumi pisortaavoq kingornalu kultur redaktøriulluni.

Henriette Rasmussen 66-inik ukioqarluni tallimanngormat eqqissilluni toquvoq. Ilaqutaasut taama nalunaaruteqarput.

Henriette Rasmussenip qimatarai aappani, ernini, panini ernuttanilu marluk.

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat