Nunatta Nunavummiullu iliniartitaaneq pillugu suleqatigiissuteqarput

Aatsitassarsiornermut ilinniarfiup suliniutaata nutaap ingerlanneqarneranut atatillugu Nunavummiut suleqatigiissuteqarput. Aallaqqaammut Nunavummiut inuusuttut marluk Sisimiuni qaarsumi qillerinermik sapaatit akunnerni arfinilinni sungiusarneqassapput.
juunip 19-at 2013 13:26

Inuusuttunik pikkorissaaneq maajip 24-ianili aallartinneqarpoq, juulillu sisamaani naggataarutaasumik misilitsinnermik naggaserneqassalluni. Nunavummiut taakku marluk kalaallit qulit peqatigalugit pikkorissarput, asulu pikkorissarneqarnerat tamarmi tuluttut ingerlanneqartoq.

Taamatut nutaaliorneq Nunavumi naalakkersuisut, Namminersorlutik Oqartussat nunanut allanut tunngasunut allaffeqarfiata kiisalu Sisimiuni Aatsitassarsiornermut ilinniarfiup suleqatigiinnerisigut piviusunngorsinnaasimavoq.

-Nunavummiut nunatsinni aatsitassarsiornermut ilinniarfimmi pikkorissartinneqartarnissaat iluaqutaassaqisoq tamatta qularinngilarput. Pikkorissariartummi taakku marluk kalaallit qulit peqatigalugit pikkorissarnerini Inuktitut kalaallisullu oqaaseqartuuneri ajornartorsiutaanavianngitsut naatsorsuutigaarput, inuiaammi taakku marluk kultoorimikkut tunuliaqutaasigut assigiissuteqartorujussuummata, Hans Hinrichsen Sisimiuni Aatsitassarsiornermut ilinniarfimmi ilinniartitaanermut pisortaasoq oqarpoq.

Gov. of Nunavut – tassa Nunavummi naalakkersuisut - aatsitassarsiornermut ilinniarfimmi pikkorissariartut malinnaavigilluassavaat, qanorlu kinguneqarumaarnersoq eqqummaariffigissamaarnerarlutikku.