Nunatta nillernera Danmarkillu kiannera ataqatigiipput
- Kalaallit Nunaanni aasaanera - maajimiilli nillataarlunilu siallerajuppoq. Silaannaap aalajangersimasumiiginnalerneranik tamanna pissuteqarpoq, Danmarkillu kiannerungaatsiarneranik kinguneqarpoq.
- Danmarkimi naqitsinertuffiup naqitsiniisaffeqartinngilaa. Naqitsiniisaffillu Kalaallit Nunaannut tunumut kitaanullu ingerlaarpoq, tamannalu maannamut nillataartitsillunilu sialleqattaartitsilluni, John Cappelen oqarpoq.
DMI naapertorlugu naqitsiniisaffiup Danmarkstræde aqqusaariarlugu nunatta sineriaani nalinginnaasumit nittaalaqarnerutitsillunilu sialoqarnerutitsivoq.
AAMMA ATUARUK Aasaq manna nillernerusoq
Danmarkshavnimi 1949-mili taama siallertigigami maajimi aatsaat taama siallertigeqqippoq, Station Nordimilu juunip qaammataani 1961-imi siallernerpaaneranut tulliulerpoq.
Nunatsinni silap nillernerujussua kalaallit nunalerisut kujataaniittut ernumanartippaat. Tamanna aviisip AG-p allaaseraa.
- Qanittumi kiatsinngippat savanit naatsitanillu ukioq manna iluanaarutissat ukiup siulianut sanilliullugu annikilleriarujussuarsinnaapput, Otto Nielsen aamma Lasse Bjerge aviisimut oqarput.
Nillernerata naatsitat ruuallu naatinniarnerat kinguaattoortippaa. Naatsiialli naatinnissaat iluatsinngitsoortutut oqaatiginissaa siusippallaarpoq.
Nunaatillit naatsiianik aggustimi naatitsinatik septembarimi naatitsisinnaanissartik neriuutigalugu, AG-mut oqaatigaat.