Nunatta namminersulivinnissaa Helle Thorningip eqqartorusuppaa

Oqimaaqatigiissaarineq saneqqunneqarsinnaassagunanngilaq Kalaallit Nunaata tunngaviusumik inatsisissaa oqaluuserineqalerpat. Tamanna naalakkersuisooqatigiit isumaqatigiissutaanni ilimatsasaarutigineqarpoq.

- Pingaartipparput Savalimmiut Kalaallit Nunaata naalagaaffeqatigiinnerup iluani tunngaviusumik inissisimanerisa ersernerluttunngunnginnissaa, Naalakkersuisunngortut taama allapput.

Kisiannili tassa Helle Thorning Schmidtip ammaffigaa naalagaaffeqatigiinnerup ineriartorteqqinnissaa taamatullu oqariartuut Folketingi ammarlugu oqalugiaammi ullaaq uteqqinneqarpoq.

- Naalakkersuisut tamakkiisumik ataqqivaat savalimmiormiut kalaallillu namminerisamik inatsiseqalernissamik kissaateqarnerat, Helle Thorning Schmidt aammali erseqqissumik oqaatigalugu kissaatigigini tamanna naalagaaffeqatigiinnerup iluani pissasoq.

Siumut sinnerlugu Folketingimut ilaasortap Doris Jakobsenip taamatut nalunaartoqarnera iluarisimaarpaa maannalu kissaatitut saqqummiuppaa Nunatta tunngaviusumik inatsiseqalernissaa pillugu Christiansborgimi tusarniaasoqassasoq.

- Taamaattumik piffissaatillugu pingaaruteqarluinnarpoq periarfissat atorluarnissaa taamalu ammaallugu Folketingimi tusarniaanissaq, Doris Jakobsen oqarpoq Helle Thorning Schmidt ammaalluni oqalugiariitsiartoq.

Ilanngullugu kissaatigaa inatsisit pillugu ilisimasaqarluartut arlaannaannulluunniit pituttorsimanngitsut misissussagaat namminerisamik tunngaviusumik inatsiseqalernissaq.

- Taamatut isumasioqatigiinnermi aamma anguniarneqarpoq tupaallannartortaqanngitsoq nammineq oqaatsivut piviusorlu nammineq atugarput tunngavigalugit namminerisamik tunngaviusumik inatsiseqalernissarput, Doris Jakobsen oqarpoq.

- Atagu tusaariartigit tunngaviusumik inatsisiliornerit suleqatigiinnerillu nutaat pitsaasumik misilittagaqarfigineqartut maanna naalakkersuisooqatigiit isumaqatigiissusiornerisa kingorna. Soorlu Margrethe Vestager isumasioqatigiinnermi uunga assigusumi oqarsimasoq - aallarteriartigu suliassaq "naalagaaffeqatigiinnerit suleqatigiinnerat" naalagaaffeqatigiinneq pinnagu, Doris Jakobsen naggasiivoq.

Taassuma aamma kissaatigaa suliassaq manna atlantikup avannaani qinikkat akunnerminni suleqatigiissutigisinnaalluaraat.