Nunatta namminersornera inuiqatigiinni sameninit nersorneqarpoq

- Samit nunaanniit Kalaallit Nunaat qissimingaarneqalaartuaannarpoq, tamaani inuiaqatigiinni ineriartornermi siuarsimaneruvusi, Samit Norgemiittut tv-qarfianni tusagassiortoq Liv Inge Somby samit Nunatsinnut isiginninnerat pillugu allappoq.

Taassuma suleqatini allat pingasut peqatigalugit Nunatsinni qinersineq pillugu Norgemi TV-qarfimmut nuna tamakkerlugu aallakaatinneqartartumut, aammalu saminut immikkut aallakaatitassioriartorpoq. Kalaallit Nunaat aamma samit nunaat assigiissuterpassuaqarput.

- Ilinniartitaaneq eqqartoraangatsigu oqaatsitigut piginnaasat maanitulli aamma eqqartortarpavut, taamaattumik ajornartorsiutivut assigiipput. Annertunerpaamik qanoq ilinniarsinnaavugut, qanoq ililluta inuusuttut ilinniagaqartissinnaavagut sulisilerlugillu.

Aammattaaq nunap pisuussutaasigut assigiissuteqarpugut: Samit nunaanni piffinni arlaqartuni aatsitassarsiorneq eqqartorneqarpoq.

Kalaallit Nunaat naluneqanngitsutut namminersuleqqammivoq, samillu namminersulernissaat suli ungasippoq. Norgep avannaani, Sverigemi, Finlandimi Ruslandimilu Samet inatsisartui taamaallaat siunnersuisuupput- pissaaneqaratik, inatsisiliorsinnaanatik aningaasanillu aqutsisinnaanatik. Tamannarpiaq pissutigalugu Inatsisartunut qinersineq samenut immikkut soqutiginaateqartoq, Liv Inger Somby oqaluttuarpoq.

- Maannakkorpiaq ilanngutassiatsinni sammisartakkavut tassaanerupput, sooq qinersisoqarpa? Sooruna aningaasaqarniarneq taama ajortigisoq? Sooruna 282 millioner koruuninik amigartoorfiusoq?

- Tassami takusagut tamakkuupput, inuiaqatigiit ajutoorpata, piffissarujussuaq atorlugu aaqqeqqinniarneqartarput. Tamannalu maani aamma takuarput, politikerit inuillu naliginnaat oqaloqatigigaagatsigit tatiginnittoqanngilaq. Qaammatimmi 18-it matuma siorna qinersisoqarpoq, kingornalu sorpassuit ajutoorsimapput, Liv Inger Somby allappoq.