Nunatta nakorsaanera: Utoqqaat akiuussutissamik januaarimi kapitissinnaalissapput
Danmarkimi akiuussusersuineq siulleq ullumikkut pivoq. Nunattalu nakorsaanera naapertorlugu akiuussutissat nunatsinnut Savalimmiunullu nassiussassat nakorsaasiorfiup Danmarkimut nassiusseqqereernerani aatsaat nassiunneqassapput.
AAMMA ATUARUK Danskeq coronamut akiuussusertittoq siulleq kapineqarpoq
- Danskit oqartussaasui aqagu ulloqeqqata siorna ataatsimeeqatigissavakka, ataatsimiinnermi Danmarki qaqugu akiuussutissanik aamma qanoq amerlatigisunik peqqissanersoq paasinissaa naatsorsuutigaara, Henrik L. Hansen KNR-imut taama oqarpoq.
Utoqqaat siulliunneqassasut
Taassuma akiuussutissat nunatsinnut ukiortaami sapaatit akunnerani siullermi apuunnissaat ilimagaa. Taamaakkaluartoq akiuussutissat pissarsiat siulliit amerlassusaat killeqassasoq oqarpoq.
- Nunarsuaq tamakkerlugu maleruagassat malippagut. Taamaattumik inuit utoqqaat illuanniittut, inuiaqatigiinni utoqqaanerusut, utoqqaat illuini napparsimmavinnilu sulisut siulliullutik akiuussusertissapput, Henrik L. Hansen oqarpoq.
Akiuussutissat 70-inik issittumi uninngatillugit toqqorsimatinneqartussaapput, nunatsinnullu tikittussat siulliit 975-iunissaat nunatta nakorsaanerata ilimagaa.
- Nuummi akiuussusersueqqaarnissarput aallartissaaq, Nuummiinnarmi immikkut ittumik qerititsiveqarpoq akiuussutissanut siullernut atorneqartussamik. Piffissalli sivikitsup iluani akiuussutissaq alla atorneqalissasoq naatsorsuutigaarput, taannalu atoruminarnerussaaq Kalaallit Nunaannilu angallakkuminarnerussalluni, Henrik L. Hansen oqarpoq.
AAMMA ATUARUK Tamaat isigalugu: Coronavirus pillugu killiffik
Nakorsaasiorfiup akiuussutissanik Danmarkimut nassiusseqqinnissaa jannuaarimi pissasoq, danmarkimiit oqaatigineqartoq, nakorsaaneq aamma oqarpoq.
