Nunatta nakorsaaneqarfia: Ernumanartoqanngilaq
Nunatsinni inuit 2.548-it covid-19-imut akiuussuserneqarsimasut nunatsinni nakorsaaneqarfiup nittartagaani tallimanngornermi erserpoq.
Utoqqaat, utoqqaat illuini najugallit peqqinnissaqarfimmilu sulisut nakorsaasiorfimmit Pfizer/BioNTechimeersumit akiuussutissani nassiunneqaqqaartunit akiuussuserneqarsinnaanermik neqeroorfigitereerput.
AAMMA ATUARUK Akiuussutissat piumaneqangaatsiartut: Naatsorsuutigisamit arriinneruvoq
Arlallit akiuususerneqarnissamut qujaannaqqaaraluarsimasut maanna akiuussuserneqarnissartik kissaatigilersimavaat.
Maannamut akiuussuserneqarsimasuni kingunerluuteqartoqarsimanngitsoq nakorsaaneqarfimmi nakorsaq ilisimatitsivoq.
- Kapitinnikut ajunngillat. Napparsimaveqarfimmiit malinnaaffigineqarput, uagullu tassanngaanniit malinnaatinneqarluta. Kapitinnikumik ippigusuttoqaraangat nalunaarsuiffimmut allattarpaat, suninnguillu tamaasa uagutsinnut aamma tusarliuttarpaat, kisianni akiuussuserneqarnerup kingunerisaanik annerusumik pisoqarnikunngilaq, nunatta nakorsaaneqarfiani nakorsaq Paneeraq Noahsen Qanoruumit tallimanngormat apersorneqarnermini oqarpoq.
Nakorsaasiorfiup Modernap akiuussutissaliaa nunatsinnut nassiunneqartussat tulleraat, akiuussutissarli nunatsinnut qaqagu tikissanersoq ilisimaneqanngitsoq, peqqissutsimut naalakkersuisup Anna Wangenheimip tusagassiortunik katersortitsinermi pingasunngormat oqaatigaa.