Nunatta nakkutigineqarnera amigarsorineqarpoq
-Qaammataasamik radarimillu angusinnaasat killeqarneri pissutigalugit timmisartut umiarsuillu paasisaanatik ingerlaarsinnaapput, Issittumi Sakkutooqarfiup pisortartaava, generalmajor Stig Østergaard Nielsen oqarpoq. Taassuma Kalaallit Nunaata eqqaani Issittumi kikkut suliaqarnerinik immikkut misissuisussanik sulisoqalernissaa kissaatigaa.
Sara Olsvigip (Inuit Ataqatigiit) umiiartoqartoqarneranut pinngortitamilu ajunaarnersuarnut tunngatillugu aammalu aatsitassanik immikkut pingaarutilinnik piiaasoqalerpat tamakku nunatsinnit imaatigut assartorneqarnerinut tunngatillugu pitsaanerusumik nakkutilliisoqalernissaa kissaatigaa.
-Aatsitassat - qinngornernik ulorianartunik akullit ilanngullugit - allanit pissarsiarineqannginnissaat qulakkeertariaqarparput, Olsvig JyllandsPostenimut oqarpoq.
Sakkutuut Kalaallit Nunaanni umiarsuarnik tallimanik nakkutilliititsivoq. Umiarsuit nakkutilliissutit marluk, angallatit nakkutilliissutit marluk pujortuleerarlu nakkutilliissut ataaseq. Nunatta sineriaata, ækvatori marloriarlugu kaajallanneratut isorartutigisup tamakkerlugu nakkutiginissaanut taakku naammaqqajanngillat.
Illersornissamut ministeriip Nick Hækkerupip (S) ajornartorsiuteqarnera nassuerutigaa, Issittumillu nakkutilliinerup illersornissaq pillugu isumaqatigiissummi nutaami pingaarutilittut inissisimanera innersuussutigalugu.
