Nunatta Karsiata imai qineqqqusaarnermi oqqassutaapput

Qineqqusaarneq aallartereerpoq. Qinersinissap ullulernissaa, tassalu juunip ulluisa aappaat, aalajangissallugu Inatsisartut ullumi ataatsimiimmata tamanna malunnarpoq. Nunatta Karsiata imai ajunnginnerarlugit Naalakkersuisunut ilaasortaq Atassumeersoq, Finn Karlsen, Inatsisartut oqaluttarfianniit oqarmat, illuatungiliuttut isumaqtiginngilluinnarpaat.
Allattoq Jens Thorin
apriilip 17-at 2009 16:58

Inatsisartut kukkunersiuinermut ataatsimiititaliaani ilaasortaq, Inuit Ataqatigiinneersoq , Olga Poulsen Berthelsen, ataatsimiittarfiup silataani aperigatsinni isumaqarpoq , taama oqarneq tunngavissaqanngitsoq.

- Kisitsisit kingulliit minnerunngitsumik takutippaat, Nunarput ukiut pingasut kingulliit 877 millioni koruunit sinnerlugit amigartooruteqartoq. Taamaattumik Inatsisartuni pisariaqartipparput, Nunatta Karsiata naatsorsuutai 2008-mut tunngasut Naalakkersuisut saqqummiutissagaat, tassami ataatsimiititaliami suli takunngilavut inatsisartunut nassiunneqanngimmata, Olga Poulsen Berthelsen oqarpoq.

Kisianni aningaasaqarnermut naalakkersuisup, Per Berthelsenip, aalajangiusimavaa, aningaasaqarnerput patajaatsuusoq.

- Aammali nalunngilara, illuatungiliuttut uparuaatissanik sakkussaaleqisut. Nunatta Karsia ullumerpiaq 2 milliardi koruunit pallillugit aningaasaateqarpoq. Massakkut inissisimanitsinni peqqutaavoq, Nunatsinni nukissiorneq qanoq inissisimassanersoq, politikikkut suli aalajangiiffigineqanngimmat. Nunattami Karsia aningaaserivittut maanna atorneqarpoq.

- Nukissiorfiilli Nunatta Karsianut attuumassuteqarunnaarsinneratigut, nammineq pilersaaruasiani tunngavigalugit taarsigassarsiniarsinnaanera aammaanneqartariaqarpoq. Kisianni Landskarsip atukkiussai annaaneqanngillat, Nukissiorfiit utertitussaammagit, Per Berthelsen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq