Nunatta Karsiata 2008-mut naatsorsuutaa naammassivoq
Naatsorsuutit inernerat missingersuutigineqartunit 71 millioni koruuninik qaffariaateqarluni ataatsimut isigalugu pitsaaneruvoq, Naalakkersuisullu tamanna naammagisimaarpaat.
Naalakkersuisulli ilutigalugu tikkuarpaat 2008-p tungaanut aningaasarsiornikkut ingerlalluarnermi ingerlatsinermut aningaasartuutit isertitaninngaanniit sukkanerusumik qaffakkiartorsimasut. Taamaattumik siunissaq ungasinnerusoq eqqarsaatigalugu aningaasartuutit isertitallu oqimaaqatigiinnerulernissaat siunertaralugu aningaasaqarnikkut politikkip tungaatigut ukiuni aggersuni sukaterinissaq pisariaqassaaq, Naalakkersuisoqarfik allappoq.
Nunatta Karsiata naatsorsuutai kinguartooqqasimapput, akileraartarnerup tungaatigut unammilligassat annertuut kingunerisaannik ilaatigut peqquteqartumik. Ukiumoortumik akileraarutitigut isertitanik allattuinerup nalunaarusiorneqarnerani nalorninartorsiortitsisinnaasumik naammattuuisoqarsimavoq, Nunattalu Karsiata kukkunersiuisui Deloitte tamanna pillugu sillimmartaarsimapput.
Aqutsisoqarfimmi suleriaatsit nutaat atuutilersinnerat pitsanngorsaatillu siunissaq eqqarsaatigalugu akileraarutitigut nalorninartorsiortitsisinnaasut pinaveersaartinniarlugit Akileraartarnermut Aqutsisoqarfiup aallarnisarsimavaat, Aningaasaqarnermut Naalakkersuisoqarfik erseqqissaavoq.
