Nunatta Karsianik kukkunersiuisut arlaannaannulluunniit attuumasuteqassanngillat

Naalakkersuisunut ilaasortat Nunatta karsiata aningaasaataanik kinguneqartinneqanngitsoortumik atuipiluttarnerat unittariaqalerpoq.

Taamaammat politikimut attuumassuteqanngitsumik Nuna Tamakkerlugu Kukkunersiuisoqarfeqalerli, aammalu kukkunersiuinermut ataatsimiitaliaq qinigaaffik tamaat atasalerluni.

Demokraatineersoq Andreas Uldum taama siunnersuuteqarpoq. Inatsisartunit taanna pingasunngornermi oqallissigineqarmat, isummat assigiinnginngerat erserpoq.

Naalakkersuisunut ilaasortaq Nunatta Karsiata aningaasaatai atorlugit assersuutigalugu tamataajartunik isiginnaariarsimappat, ullumikkut aaqqissuussineq malillugu uparuaasussaq tassaavoq Kukkunersiuinermut Ataatsimiititaliaq, taava Inatsisartut tamarmiullutik qanoq kinguneqartitsissanerlutik aalajangertarlugu.

Kukkunersiuinermut ataatsimiititaliaq tallimanik ilaasortaqarpoq, ukiakkut ataatsimiilernermi qinerneqartartunik.

Inatsisartoqarneq kukkunersiuisarnerlu avissaagatinnerujumallugu maanna siunnersuutigineqarpoq, arlaannaannulluunniit attuumassuteqanngitsumik Nuna Tamakkerlugu Kukkunersiuisoqarfeqalissasoq - suli Inatsisartut ataanniittussamik kisiannili Inatsisartut allattoqarfiattut Inatsisartullu ombudsmandiatut qaffasissuseqartumik.

Aningaasaqanermut naalakkersuisup Palle Christiansenip oqarneratut, innuttaasut pasillertarnerat qaangineqassammat, isuma tamanna Naalakkersuisut isumaqatigaat.

- Kukkunersiuinermut ataatsimiititaliami ilaasortat ilaannik sakkortoorujussuarmik isummertumik, siusinnerusukkut aviisini atuartarpugut. Kisiannili sapaatip akunnerata tulliani ilaasortaq taanna isummaminik mumisitsilluinarsimasoq aamma atuartarlugu. Tassa ilaasortat ilaat inissinneqartarsimagunarput. Tamannalu qinikkanik tatiginninnermut iluaqutaanngilaq, Palle Christiansen oqarpoq.

Taassuma akissuteqaatini ullumi saqqummiukkamiuk aatsaat takulerpaa, titarnertaaq ataaseq ilaasussaanngikkaluartoq peerneqarsimanngitsoq. Kisianni oqalunnissaminut piffissaliussaq naammat, akissuteqaatini tamakkerlugu atuanngitsoorpaa. Titarnertaami piinngitsuukkami Naalakkersuisut siunnersuummut nangaassuteqarnerat ersersinneqarpoq.

Taama pisoqarmat, Siumut allamik isumaqalerpoq, Siumup oqaaseqartartua, Kristian Jeremiassen, oqaluttarfimmiit saqqummiussai allaanerummata.

- Naalakkersuisut sangujoraarnerat, ullormiit ullormut ingerlatsinerat ajornartorsiutigilerparput. Toqqissisimasumik ingerlanissaq ujartorlutigu, siunnersuutip ataatsimiititaliami suliassanngorlugu Siumumiit innersuussutigaarput, Kristian Jeremiassen oqarpoq.

- Naalakkersuisuni isummagut ullormiit ullormut allanngorneq ajorput. Kristian Jeremiassenip tamanna misilittagaqarfiginerugunarpaa, taanna aperiniarsiuk, Aningaasaqarnermut nalakkersuisoq akivoq.

Aalajangiinissamutsiunnersuut Inatsisartuni oqallisigineqarmat, Siumup Palle Christiansen arlaleriarlugu isornartorsiorpaa, paatsiveerussaaanerarlugu.

Tamatumunnga Palle Christiansen qisuariarpoq oqarluni, Siumup paatsiveerusimaarnera innermik anitsisup qullaatsitaasa nunatsinnut qulagiunneranit malunnarnerusoq.

Taamaattorli akissuteqaatip iluarsineqanngitsoorsimanera nammineq akisussaaffigalugu oqaatigaa.

- Akisussaaffik uanga tigumiarlugu arlaleriarlunga oqaatigereerpara, neriuppungalu atuartartut - allaallumi aamma Siumup tamanna paasissagaat, Palle Christiansen oqarpoq.

Taavami Siumut qanoq isumaqarpa?

Nangaassutit kukkunikkut ilaatineqartut Naalakkersuisut akissuteqaammiit piinngikkallarmatigit, Siumut siunnersuummut naaggaarniaraluarput, oqaluttarfimmiilli inassutigalugu, ataatsimititaliami suliarineqassasoq

- Siunnersuutip ajortortai pitsaasortaalu misissussavagut. Kisianni Naalakkersuisut ullormiit ullormut isummertajaarmata aamma misissugassat arlaqaalulerput, Siumup oqaseqartartua Kristian Jerimiassen oqarpoq.

Siunnersuut Inatsisartut Siulittaaasoqarfianni suliarisassanngorlugu ingerlateqqinneqarpoq.