Nunatta karsia sinneqartoorpoq
Nunatta Karsia 79 millioni koruuninik, ilassutitut aningaasaliissutit ilanngullugit, amigartoortussanngorluni missingersuusiorneqarsimagaluarluni siorna 2005-imi 274 millioni koruuninik sinneqartooruteqarpoq, tamannalu aningaasaqarnermut naalakkersuisup Josef Motzfeldtip, Inatsisartut upernaakkut ataatsimiinnerat naammissilerpat saqqummiutissagaa, Namminersornerullutik Oqartussani aningaasaqarnermut pisortaqarfiup pisortaa Peter Beck nalunaarpoq.
2005-imi sinneqartoorutaasimasut ukioq mannamut aningaasanut inatsimmi allannguinernik malunnaatilinnik nassataqalereerput. Akileraarutinit akitsuutinillu isertitassatut naatsorsuutigineqartut kiisalu ernianit isertissamaakkat katillugit 100 millioni koruuninik qaffanneqarput.
Nunatta Karsiata siorna sinneqartoorutai missingersuusiornermi siumut isigineqarsinnaasimanngillat. Siorna aningaasanut inatsisissatut siunnersuutip 2004-imi aasakkut suliarineqarnerata naalani aningaasarsiorneq ingerlalluarunnaarsimavoq, 2004-illi naajartornerani 2005-imilu tamarmi aningaasarsiorneq pitsanngoriartorsimavoq taamalu isertitat amerleriarsimaqalutik isumaginninnikkullu aningaasartuutit inatsisitigut pisussaaffiusut ikileriarsimallutik.
Sinneqartoorutit sivisuumik nunatta karsianiinnissaat taamaattoq ilimagineqarsinnaanngilaq, ukioq manna aappaagumullu amigartoortoqarnissaanik missingersuusiortoqareermat.
