Nunatta karsia imaaruteqqajaasoq
Naalakkersuisut aningaasaqarnikkut sukaterinngippata, Nunatta Karsiani aningaasat tigoriaannaat ukiup aappaa affaq qaangiuppat ikippallaalersimasinnaapput.
Tassami Nunatta Karsia 2008-p naaanerani 884 millioni koruuninik uninngasuuteqarpoq. Naalakkersuisut ukiup affaani siullermi aningaasanut inatsimmi ilaanngitsunik arlaleriarlutik aningaasaliissuteqarmata, aningaasaatit tigoriaannaat ikiliarujussuarsimapput.
Nunatta Karsiata 2008-imut naatsorsuutaani takuneqarsinnaavoq, aningaasat tigoriaannaat ukiup naanerani 2,055 milliardi koruuniusut. Kisianni taakkungannga 286 millioni koruunit 2009-mut Danmarkimit ataatsimoortumik tapiissutissanit siumuugaapput. Aamma 885 millioni koruunit allat sanaartugassat naammassineqarnissaannut immikkoortinneqarsimasuupput.
Nunatta Karsia taamaalilluni tigoriaannarnik 884 millioni koruuninik ukiup naanerani uninngasuuteqarpoq.
Kisianni ukiup matuma affaani siullermi Naalakkersuisut arlaleriarlutik aningaasaliissuteqartarput, aningaasanut inatsimmut ilaanngitsunik.
Assersuutigalugu Royal Greenland qinersinerup kinguninngua aningaaanik ikiorserneqarpoq, Nunatta Karsianut 500 millioni koruuninik sunniuteqartumik, soorluttaaq Great Greenland Arctic Green Foodilu aamma aningaasaliiffigineqartut.
Taamaammat naalakkersuisut unammilligassaqarput.
- Nunatta Karsiata naqqa ukiuni kingullerni erseraluttuinnarsimavoq isertugaanngilarlu, tigoriaannarnik aningaasaqarniarnerput kipiluttunartuummat. Qaqugukkulluuniit karsimi 600 millioni koruuninik uninngasuuteqartuartariaqarpugut, aningaasaqarnermut naalakkersuisoq Palle Christiansen oqarpoq.
Aningaasaqarnermut naalakkersuisoq aamma oqarpoq, Nunatta Karsiata aningaasaqarnera ima inissisimasoq, ukiup aappaa affaq ukiulluunniit marluk qaangiuppata aningaasaat tigoriaannaat ikippallaalersinnaallutik.
- Aningaasartuutit ikilisarlugit Naalakkersuisuniit tamanna aaqqiiviginiarparput. Ingerlatsinermut sanaartornermullu aningaasartuutit aammalu atukkiuttakkat ikilisarnerisigut aammalu nutaanik isertitaqalernikkut, aningasaqarnerput aaqqiivigerusunnerpaavarput. Kisianni tamanna iluatsinngippat, nunani tamalaaniit aningaasanik atorniartariaqalersinnaavugut, aningaasaqarnermut naalakkersuisoq oqarpoq.
Aamma siunertaraarput, inuinnaat akileraarutaat qaffannaveersaassallugit, kisianni akitsuutit ilaat qaffattariaaqalersinnaavagut imaluunniit nutaanik akitsuusiilluta, Aningaasaqarnermut naalakkersuisoq, Palle Christiansen oqarpoq.
