Aningaasartuutissatut missingersuutit malillugit 441 million koruuninik amigartooruteqassallutik Naalakkersuisut naatsorsuutigaat. Taamaattoqanngilarli, amigartoorutit naatsorsuutigisamiit annerungaarput, tassa 950 millionit koruuniugamik.
- 441 millionit koruuninik amigartooruteqarnissaq naalakkersuisooqatigiit siuliinit kingornuppagut. Royal Greenland aningaasaliiffigisimanngikkaluarutsigu akiliisinnaajunnaarsimassagaluarpoq, tamannalu nunatsinnut kinguneqarnerlorujussuarsimassagaluarpoq.Taamaammat aningaasat amigartoorutigisagut piumasaannarmik atorneqanngillat, iluaqutaasussatut atorneqarput, aningaasaqarnermut naalakkersuisoq Palle Christiansen oqarpoq.
Qaasuitsup kommunea aningaasatigut ajornartorsiormat 53 millionit koruuninik atukkerneqarpoq.
Napparsimavinnilu suliaritittussatut utaqqisut ikilisarniarlugit aningaasartuutit 7 millionit koruuninik ilaneqartariaqarsimapput.
Nunatta karsiattaaq Nukissiorfinnut aningaaseriviusimagallarujoq, tassami 200 millionit koruuninik atukkiigami.
- Nukissiorfiit imermik nukissiuutinik sanaartornerat nammineq aningaasalersorsinnaannginnatsigu, Nordisk investeringsbankinut atornissatsinnik isumaqatigiissusiorpugut, uagut Naalagaaffittut isumaqatigiissummik pitsaanerusumik pissarsisinnaagatta, taamaalilluta Nukissiorfiit nunatta karsianiit atukkerutsigit, inuiaqatigiinnut akikinnerusumik aaqqiissuteqarsinnaagatta, Palle Christiansen oqarpoq.