Nunatta Karsia 299 millioni koruuninik amigartuussaaq
Per Berthelsen marlunnik siunnersuuteqarpoq. Siullermik Nukissiorfiit aningaasanut inatsimmiit peerneqarsimassaaq, aappaanilu Nukissiorfiit aningaasanut inatsimmiginnarnissaannik Inatsisartunit aalajangiussisimanissaat, sillimaffigaa.
Siunnersuummi iluarsaassami ingerlatsinermut sanaartornermullu aningaasaliissutissani 145 millioni koruuninik sipaarutissanik nassaarsimapput.
Illuliorniat kommunillu inissianik sanaartorniartut tamatumani eqqorneqarput. Illuanik Sanaartugassanut Iluarsagassanullu Aningaasaateqarfimmiitsitat 700 millioni koruunit ilaat atorlugit sanaartugassat uninngasut aallarteqqinneqarnissaat Naalakkersuisut siunniuppaat.
Aamma Alcoamut aningaasaliissutit 291 millioni koruuninik ikisilinneqarput, aluminiuliorfissamut 2009-mi aningaasaliissutit 90 millioni koruuniussallutik.
Paarisa innuttaasullu peqqinnerulernissaannut suliniut aamma sipaarfigineqassapput, taakkununnga aningaasaliissutit 3,5 millioni koruuninik ilanngarneqarmata.
Inerisaavimmut aningaasaliissutit qulerarterummik aamma ilanngarneqarput.
Per Berthelsenip aningaasanut inatsisissatut siunnersuutaani Nunatta Karsia taamaalilluni 299 millioni koruuninik amigartuussaaq.