Nunatta juulimaavanut - Nunafondenimut akiligassat qaleriaapput.
Ingerlatsinermut aningaasartuutit annertoorujussuupput. Aningaasartuutit ukiut ingerlanerini annertusigaluttuinnarsimasut. Aningaasaateqarfik siornatigut Grønlandsbankenimiit ingerlanneqarsimavoq, tassanngaanniit allatseqartinneqarluni. Allatsip annikitsumik ajunngitsorsiassaqartinneqarluni, qinnuteqaatit katersortarpai siulersuisunullu ingerlateqqittarlugit, taakkumi tapiiffigiumasatik aalajangiiffigisarpaat.
Aningaasaateqarfik kingorna pisortartaarpoq. Ullumikkut Steffen Petrussenimit inuttaaffigineqartumik, saniatigullu ilinniartumik ikiorteqartarluni. Tamatumunnga aningaasartuutit ukiumut 855.000 koruuniupput.
2010-mi aalajangertoqarpoq pisortap biileqarnissaa tapiiffigineqartariaqartoq, tassungalu ukiumut 80.000 koruunit atorneqartalerput. Saniatigut aalajangertoqarpoq pisortaq ukiuni siuliini tapiiffigineqarsimannginnami qaavatigut 146.000 koruuningajannik tunineqassasoq. Ukioq taanna biileqarnermut tapiissutit 226.000 koruuninngorput, kingornalu biilinut ukiumut 80.000 koruunit atorneqartalerput.
Taakku qaavatigut aningaasaateqarfiup taxanut 10.000 koruunit ukiumut atortarpai.
Steffen Petrussen attavigisimavarput, peqataarusussimanngilarlu aningaasaateqarfiup aalajangiisarneranut attuumassuteqannginnami. Paasitikkusuppaali aningaasaateqarfiup ukiuni kingullerni ingerlatsinermut aningaasartuutai qaffakkaluttuinnarsimammata. Minnerunngitsumik ullutsinni siusinnerusumut naleqqiullugu tapiissutaasimasut malinnaavigineqarnerusalermata.
Aningaasartuutinut ilaavoq aningaasaateqarfiup allaffeqarfia. Siusinnerusukkut Nuup umiarsualivianut qanittumi akikittumik allaffeqarpoq, Arktisk Kommandoli inissaqartinniarlugu attartorneqarsinnaajunnaariataarmat nuuttariaqalersimalluni. Taamaattumik aningaasaateqarfik illoqarfiup qiterpasissuani maanna allaffeqarpoq innuttaasunit alakkartarniassammata. Isillattaasoqartarpormi naak qaqutigooraluartoq, Petrussen oqarpoq.
Allaffeqarfik siorna 357.000 koruuneqarpoq, taakkunannga iluarsartuutassanut 105.000 koruunit atorneqarsimallutik. Pequtinut, allaffimmilu atortunut nutaanut aserfallatsaalinermullu 185.000 koruunit atorneqarsimallutik.
