Nunatta IWC naammagilerpaa
Ukioq mannamut arfattassanik Nunarput nammineerluni, IWC-millu akuerineqarani amerliliivoq, Aalisarnermut, Piniarnermut Nunalerinermullu Naalakkersuisoq, Ane Hansen taama oqarpoq.
- Arfattassiisarnerput IWC-mit ukiorpassuarni akimmisaartinneqartarsimavoq, taamaattumik IWC-p ajattarneqarnissaa uangut Nunatsinnit peqataaffigerusupparput, Ane Hansen oqarpoq.
Nunatsinni arfattassat qulinik amerlineqannginneranni IWC-mut tamanna nalunaarutigineqareerluni tusarniaassutigineqaraluarpoq. IWC-mili nunat ilaasortaasut 34-it isumaqataanatik nalunaarput, 25-it isumaqataagaluartut nunallu pingasut taaseqataanngitsoortut.
Tusarniaanerup taama inerneqarnerata kinguneranik, Nunarput siullermeerluni namminerluinnarlu imminut pisassippoq, arfattassallu qulinik ilallugit. Taamaalilluni IWC-ip piumasaqaatai Nunatsinnit malinneqanngillat.
Nunatsinnit tunngavilersuutigineqarpoq, ilisimatuussutikkut illersorneqarsinnaasut iluanni pisassiisoqarmat naak tamanna IWC-mut ilaasortat ilaannit aamma uumasunik illersuiniaqatigiinnit isumaqatigineqanngikkaluartoq, tassami amerliliinermut akerliusut isumaqarput, Nunatsinni arfanniarneq nunatta inoqqaavinit inuuniutigineqarunnaarsimasoq.
- Naalakkersuisunit suliniutigaarput, inuiaqatigiiusugut nunatta pissarititaannik immitsinnut siunissami nerisinnerulernissarput immitsinnullu pilersornerulernissarput aamma siunertaralutigu. Taamaattumik ukioq manna arfernik taama amerlatigisunik pisassiissutit ilavagut, Ane Hansen oqarpoq.
- IWC-mut ilaasortaajunnaarnissamik suliuniuteqarneq qiutiunngilaq, ilisimatuussutikkulli illersorneqarsinnaasumik pisarineqarsinnaasutut tikkuakkat iluini immitsinnut inuutinniarnissarput qitiulluni. Tassami Naalakkersuinikkut suliniutigisuaannarparput, avataaniit inuussutissanik Nunatsinnut eqqussuinerup killersorneqarnisaa Nunattalu pissarititaannik annertunerusnik nerisaqalernissarput siunertaralutigu, Aalisarnermut, Piniarnermut Nunalerinermullu Naalakkersuisoq, Ane Hansen taama oqarpoq.
