Nunatta IWC avaqquppaa
2012-ip ingerlanerani arfattassiissutissat Naalakkersuisut IWC-mut isumaqatigiinniutigimmatigik arfattassat qulinik ilaneqarnissaat piumasarineqarsimagaluarpoq, tamannali IWC-p itigartimmagu arfattassiissutissat namminneerlutik aalajangertalerniarlugit Naalakkersuisut siunniuppaat.
Arfattassiissutissammi ilaneqarnissaat nunat IWC-mut ilaasortat taasissutigimmassuk nunat 34-t itigartitsipput, nunallu allat 25-t akuersisimagaluarnerisa saniatigut nunat allat pingasut taaseqataanatik.
Taasineq qaangiummat nunatsinnut pisasseeqqinnissaq pillugu IWC-mi tusarniaasoqaqqinnissaa Nunatta iluatsikkaluarpaa, amerlanerusunilli pisassiisoqarani.
Arfattassiissutinik amerlanerusunik Nunatsinnut tunniussisoqarnissaanut nunat akerliusut tassaapput EU-mi nunat tamavimmik, Danmark kisiartaalluni akuersigaluartoq. EU-mi nunat isumaat malillugu nunat inoqqaavisa pisariaqartitaat sipporlugu arfattassiisoqartalersimanerarpaat, arferillu neqaat nunatsinni pisiniarfinni neriniartarfinnilu tunineqartalersimasut. Takornarianut aamma sassaalliussaasinnaanngormata arferit iluanaarniutigineqartalersimasut, EU-mi nunat isornartorsiuinerminni tunngavilersuipput.
Arfattassiissutissalli nunatta namminneerluni maanna aalajangertalerpai. Arfattassiissutillu 211-niit 221-nut amerlineqarnerat kitaani tikaagulliusaartassat 18-it pisarineqarsinnaalernerinik kinguneqassaaq, tamatumalu saniatigut arfiviit marluk, qipoqqaat qulit aamma tikaagulliit 178-it kitaata sineriaani pisassiissutigineqartussanngorlutik.
Tunu aqqaneq-marlunnik tikaagullittassaqassaaq.
Maanna arfattassiissutissat Naalakkersuisut ukiuni pingasuni pisassiissutissamaagaanneersuupput, arfattassallu amerlassusilerneqarneri nunatta Canadamiullu qilalukkat pillugit ataatsimiititaliaat tusarniaaffigineqareersorlu amerlassusilerneqarsimallutik. Tamatuma saniatigut nunat tamalaat ukioq 2013-imut isumaqatigiissutaat, uumasorsiuut innersuussutaat, atuisartut ilisimasaat, kiisalu piniartut ataatsimiititaliaat, tunuliaqutaralugit arfattassiissutissat aalajangerneqarsimasut Naalakkersuisut tusagassiuutinut nalunaarput.
