Nunatta isiginnaartitsiviata siunissaa neriunartoqarpoq
Nunatsinni ingerlatarpassuit assigalugit isiginnaartitsinerup silarsuaani aningaasat apeqqutaalluinnarput pingaartumik isiginnaagassiat angalaarluni takutinneqartussaatillugit. Nunatta isorartunerujussua pissutigalugu isiginnaagassiat annertuut nuna tamakkerlugu angallanissaat ajornarluinnarpoq.
- Assersuutigalugu 'Qullissara'-mi inuit peqataasut aqqaneq marluupput angalanerlu akisugaluaqisoq isiginnaagassiap immikkuullarinnera pissutigalugu angalaarunniarlugu aalajangersimavugut. Isiginnaagassialli angalaarunneqartartut tassaanerupput ataasiakkaaginnarnik isiginnaartitsisullit. Aappaagulu isiginnaagassiat taama ittut marluk angalaaruttussaavagut. Angalaarussassap aappaa tassaavoq Josef, Jiisusip ataatassaa pillugu inuup ataatsip isiginnaartitsissutissaa. Aappaalu tassaavoq Dario Fop isiginnaagassiaa Maop Kinami siuttunngorneranut tunngasoq. Taakku tamarmik quianartutut suliaapput ilimagaarpullu isiginnaartut tamanna nuannarilluarumaaraat, Nunatta isiginnaartitsiviani isiginnaartitsinermut pisortaq Svenn B. Syrin oqarpoq.
Nunatsinni isiginnaartitsinermut ilinniarsimasut ikittuinnaapput. Ilaat Sverigemi najugaqarput allat Danmarkimi najugaqartut. Nunatsinnili isiginnaartitsinermut ilinniarfeqalerneratigut nutaat aallartissinnaanngorput.
- Ilinniartutut aallartittut tallimat siunissamut isumalluarfigaavut. 2014-mi naammassigunik Holbergip isiginnaagassiaa 'Jeppe qaqqarmiu'p kalaallisuunngorlugu suliarinera peqataaffigissavaat. Tassani Nille kalaallisuinnaq oqalussaaq inuttat allat oqaatsit arlariit atorlugit oqaluttut. Isiginnaagassiaq taanna angalaarutissavarput taamanikkornissaanullu isiginnaartitsisartunngorlaat isiginnaagassiat qanganisaanerusut aammalu kalaallit isiginnaagassioriaasiat ilinniareersimassavaat, Svenn B. Syrin oqarpoq.
Annerusumi uani atuarsinnaavutit Nunatta isiginnaartitsivia pillugu uani atuarsinnaavutit: http://www.silamiut.gl
Jeppe qaqqarmiu uani atuarsinnaavat: http://da.wikipedia.org/wiki/Jeppe_p%C3%A5_Bjerget
