Nunatta Isiginnaartitsisarfiata isiginnaartitsissusiani nutaaq qanittukkut takuteqqaassavaa

"Rosa-Mariiap tiguartikkaluarnera" atuakkiortup Wendy Lill-ip oqaluttualiaanut taaguutaavoq, taanna Canadami pilersinneqaqqaarpoq, allaqqinneqarnermigulli Nunatsinni pissutsinut naleqqussagaalluni.

Isiginnaartitsissutip pilersinneqaqqaarnerani, oqaluttuarineqartoq tassaavoq peqqissaasoq arnaq Canadami indianernut reservatimi sulisuusoq. Nunatta Isiginnaartitsisarfiata suliareqqitaani, qallunaap Rosa Marie Andersenip Qeqertarsuup Tunuani illoqarfiit ilaanni 1969-imi peqqissaasutut sulinini oqaluttuaraa.

Rosa Mariia inuusuttuuvoq uppiasoq, angisuunik kusanartunillu anguniagalik, taannalu illoqarfimmit inunngorfimminit Aarhusimit Qeqertarsuup Tunuanukarpoq kalaallit "annaassinnaaniassagamigit".

Rosa Mariia qaammatini qulingiluani sulereerluni, "annaassinissaminik ikiuinissaminillu" takorluukkani qatangiinnarmata, Danmarkimut angerlaannarpoq.     

Taassuma Kalaallit Nunaanniinnermini inooqatigiinnikkut pissutsit piviusut aamma Kalaallit Nunaannut "ikiuiartortussatut" aallartitat atorsinnaannginnerat misigai.

Tamatuma kinguneranik Rosa Mariia eqqarsartaatsimigut nanertisimalerpoq pakatserujussuarlunilu. Aamma Danmarkimi peqqissutsimut oqartussat misigisani pillugit oqaloqatiginiaraluaramigit tusaajumaneqanngilaq.

Taamaattumik isiginnaariat taassuma oqaluttuai tusarnaartariaqassavaat.

Else Danielsen Rosa Mariiamut inuttaavoq, isiginnaagassiallu takuteqqaarneqarnera taassuma illoqarfiani Qeqertarsuarmi aggustip 24-anni pissaaq. Qeqertarsuaq taamaalilluni siullermeersumik isiginnaagassiamik takutitseqqaarfiussaaq.

Isiginnaagassiaq Nunatta Qeqqani Kujataanilu illoqarfinni aggustimi, septembarimi novembarimilu isiginnaartitsissutigineqassaaq.