Nunatta Isiginnaartitsisarfiata isiginnaagassiaq qititassiaq nutaaq Katuami unnugu takuteqqaassavaa

Nunatta Isiginnaartitsisarfiata pisortaa Svenn Syrin peqqissutsimut pinaveersaartitsinermullu aqutsisoqarfimmi PAARISA-mi ataatsimeeqataatillugu isumassarsiaq pinngorpoq. Arnap inuusuttup inuunermi oqaluttuassartaa ataatsimiinnermi tassani oqaluttuaraa.

Taassuma peroriartornermini misigisimasani tassaasut, qanigisami akornanni imigassamik atornerluineq, nakuuserneq imminullu toqunnerit oqaluttuarai.

Tamatumali peqatigisaanik oqaluttuarineqarluni arnamik tunniutiinnartanngitsumik oqaluttuaq, naak suut tamarmik killormut noqitsisutut ikkaluartut, namminerminut ilaquttaminullu ajunngitsumik inuuneqarnissamik ineriartortitsisimasoq.

- Arnap taassuma inuunermini sorsuutigisimasaasa tamanit ilisimaneqalersinnissaat nukissamillu aallerfigineqarsinnaanissaat sulissutiginiarlugit aalajangerpunga, Svenn Syrin oqarpoq. Taassumalu arnaq peqatigalugu isiginnaagassiaq taaguuserpaat Mikiseq, ballettimillu ilitsersuisartoq Ruth Montgomery-Andersen peqatigalugu isiginnaagassiamik pilersitsillutik.

Nipip Mikisip inuunerminik oqaluttuaa oqaluttuarissavaa, balletimillu qitittartut pingasut, Italiameersup, Franskip kalaallillu qitillutik oqaluttuaq attortinnartoq oqaluttuarissavaat, Norgemiup erinniortup Benjamin Mørkip erinniaa qitillugu.

Imminut toquttarnerup ajornartorsiutaanera, nunani tamani atuuppoq. Taamaattumik Mikisip oqaluttuassartaa kalaallisut, qallunaatut tuluttullu oqaluttuarineqarpoq.

Tassami Nunatta Isiginnaartitsisarfiata neriuutigaa, Mikisip inoorusussutsimik oqaluttuaa, nunani allamiunit aamma paasineqarsinnaassasoq.