Nunatta Isiginnaartitsisarfiani takutitsinermut sungiusartut alakkarsinnaavatit
Isiginnaagassiaq “The Blues” Nunatta Isiginnaartitsisarfiata Arctic Winter Games 2016-imut tapersersuillutit tunniussarivaat. Marsip pingajuani takutinneqqaqqaarpiassaaq, isiginnaagassiallu piariinnginnerani piareersagassanik ulikkaarput.
Pisartunit allaanerusumik isiginnaartitsisarfiup, marlunngornermi februaarip 16-iani nalunaaqutaq arfineq-marlunut, matuni tamanut ammassavai:
- Isiginnnaartitsinissamut, soorlu ”The Blues”-imut, qanoq piareersartoqartarnersoq, tamanut ammasumik takutikkusupparput, ilaatigt isiginnaagassiamut suliarinnittut oqaloqatigineqarsinnaasassapput. Nipilersortartunik tikeraartoqarpugut, taamatuttaaq eqqumiitsulioriaatsit assigiinngitsut iluanni inuit ilisimaneqarluartut, isiginnaagassiamut suliarinneqataapput. Takutitseqqaarnissatsinnut ulapuppugut. Susanne Andreasen, isiginnaartitsisarfimmi pisortaq oqaluttuarpoq, nangillunilu;
- Isiginnaagassiamik qanoq suliarinnittoqartarnersoq, Nuummi innuttaasunut saqqummiukkusupparput. Taamaammat, akeqanngittumik iserfigisinnaasassinnik aggersaavungut. Isiginnaagassiaq takusassarsi naammassineqanngilaq, tamaakkaluartoq ilissinnut, qanoq isiginnagassiamut sungiusartoqartarnersoq misigitikkusupparput, taamaalillusi isiginnaartitsisarnerup silarsuaa qanoq ingerlariaaseqarnersoq paasisaqarfigilaarsinnaagassiuk.
Isiginnaagassiami ”The Blues”-imi, nipilersorneq isiginnaartitsinerlu kattunneqarnikuupput, Nunatsinni Nunanilu Avannarlerni nipilersortartut eqqumiitsuliortullu pitsaanerpaat ilaat katersornikuullugit.