Nunatta isiginnaartitsisarfia isiginnaartitsinermik ilinniartussarsiortoq
Nunatta Isiginnaartitsisarfiani ilinniartoq ukiut aappaata affaata matuma siorna ataasiinnaavoq.
Ilinniarfik ilungersulerpoq ilinniartullu – ataaseq minillugu ilinniarnerminnik unitsitsiinnarput.
Maanna taamaattoqarunnaarpoq. Ilinniarfimmi ilinniartut maanna arfiniliupput, taakkunannga ataaseq immikkut akuerisaasuulluni, ilinniarfiup pisortaa, Ruth Montgomery-Andersen paasissutissiivoq.
AAMMA ATUARUK Isiginnaartitsisartunngorniarfimmi ilinniartutuaq: - Kiserliornarsinnaavoq
2019-imi aasaanerani ilungersunartorsiorfiup kingorna immikkut ittumik misilitsittoqarpoq, tassanilu sisamat akuerisaapput – maannalu aamma misilitsittoqaqqissinnaalerluni.
- Qassit qinnuteqassanersut naluarput, kikkummi tamarmik qinnuteqarnissamut tikilluaqqusaapput, Ruth Montgomery-Andersen oqarpoq.
- Pingasoriarlugu paasissutissiinermik ataatsimiitsitsivugut, peqataasut aqqaneq-marluk missaanniipput, ataasiakkaallu 30-t Facebookikkut, e-mailikkut oqarasuaatikkullu saaffiginnipput. Ilinniarfik pillugu soqutiginnittoqarluarpoq.
Video alangaarinermi immiussaq erinarsornerlu
Ilinnialertussat ilinniarfimmit akuerineqarnissamut misilitsinnerit marluk angusiffigissavaat.
Misilitsinneq siulleq maanna ingerlanneqartoq – videomik kisimiilluni angalaarilluni immiussineruvoq.
Tassani aamma erinarsuummik nammineq toqqakkamik erinarsortoqassaaq, ilinnialerusuttorlu imminut naatsumik ilisaritissalluni.
Taakku tamarmik ataatsimoortillugit sivisunerpaamik 10 minutsinik sivisussuseqassaaq.
AAMMA ATUARUK Kalaaleq isiginnaartitsisartoq Reumertimik nersornaasigassatut innersuunneqarpoq
Misilitsinnerup aappaanut akuerisaasimagaanni Nuummut misilitsikkiartortoqassaaq, Tamannalu aappaagu sapaatip-akunnerani 4-mi ingerlanneqassalluni.
Ilinnialernissamut akuerineqartut ilinniakkamik 2021-mi aggustip qaammataani aallartitsissapput.
Ruth Montgomery-Andersenip oqarnera naapertorlugu isiginnaartitsinermik ilinniarfimmit 2019-imi aasakkulli ilinniartunik unitsitsiinnartoqanngilaq.
