Nunatta Isiginnaartitsisarfia aallartilluartoq

Ukiumoortumik nalunaaruterpassuit akornanni Nunatta Isiginnaartitsisarfia siullermeerluni ukiumoortumik maanna aamma nalunaarusiaqarpoq. Isiginnaagassiat tallimat iluatsilluartumik suliarineqarsimasut tassani takuneqarsinnaavoq, taakkulu nunatta inuisa pingajoraterutaasa isiginnaariarsimavaat.
Allattoq Jette Andersen
apriilip 19-at 2013 11:55

Isiginnaartitsinerit 78-it Nunatta Isiginnaartitsisarfiata inunnut 15.577-inut sinerissami takutissimavai. Siorna Kitaaniiginnarlutik, kujataani Nanortalimmiit avannamut Uummannaq tikillugu angalasimallutik.

2012-imi nuannarineqarnerpaavoq nipilersugassiaq isiginnaartitsinertalik "Qullissara", illoqarfiup aamarsuarsiorfiusimasup inuerutitap, Qullissat, nipilersuutit taallartallit atorlugit ilisaritinneqarnera.

Isiginnaagassiaq Qullissani aasaq takuteqqaarneqarpoq, illoqarfiup 1972-imi matuneraniit ukiut 40-ngornerat malunnartinniarlugu. Sinerissami takutinneqaqattaarmat inuit 6.388-it takusimavaat.

Aammali juullerpalaartumik isiginnaagassiaq "Sanasoq nissiararlu" juullip qaammataani meeqqanit 3.884-init isiginnaarneqarsimavoq.

Isiginnaartitsisarfimmiut ilinniartutillu Canadami maannakkorpiaq qaammat ataaseq angalapput, isiginnaartitsisartut naggueqativut allat peqatigalugit isiginnaagassiarsuaq "The Raven", "Tulugaq" angallallugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq