Nunatta isiginnaartitsisarfia aallartilluarpoq
Isiginnaartitsisarfimmut ukioq siulleq pikkunarsimaqaaq.
Namminersorlutik Oqartussat atorfinitsitseqqusiunnaarnerat pissutigalugu sulilersussat atorfinitsivinnissaat sivisuumik utaqqineqarpoq.
Isiginnaartitsisarfik piffissap ilaani aamma "angerlarsimaffeeruppoq", tassami KNR-ip Illuutitoqaani, Isiginnaartitsisarfiup maanna ineqarfigisaani, oqoqartoq paasineqarmat.
Tamatuma kinguneraa, isiginnaartitsisartunngorniat atuarfissaasa aallartinnissaata ukioq-mannamut kinguartinneqarnera, ilinniartussallu tallimat maanna toqqarneqaqqammerput, aggustip naalernerani atualissallutik.
- Aallartinnissamut ajornartorsioraluarluta Nunatta Isiginnaartitsisarfiata ukioq siulleq atuuffia siulersuisunut ilaasortat naammagisimaaqaat, siulersuni siulittaasoq, Juaaka Lyberth, oqarpoq.
Isiginnaagassiat sisamat ukiup ataatsip ingerlanerani suliarineqarput, taakkulu nuna tamakkerlugu 5.000-init takuniarneqarput. Marlussuit KNR-TV-kkut aamma takutinneqareerput.
Isiginnaagassiat suli allat marluk aamma naammassineqarput, taakkulu ukioq-manna siullermik takutinneqareerlutik.
- Eqqumiitsuliornikkut aningaasaqarnikkullu ingerlalluaraluarluta suli namminerisamik ineqannginneq ernumanarpoq, Juaaka Lyberth oqarpoq.
Aggustimmi qaammataaniit isiginnaartitsiviup init atugai isiginnaartitsisartunngorniat atulissavaat. Taamaammat siulersuisut ulluinnarnilu aqutsisut tamaviaarput init naleqquttunik nassaarniarlutik, nalunaarummi ilaatigut oqaatigineqarpoq.
