Nunatta imminut arfattassinnera ICC'p taperserpaa
Arfanniarnermut Ataatsimiititaliarsuup Kalaallit Nunaata arfernik angisuunik 209-nik pisassinneqarnissamik piumasaqaataa maannamut itigartissimavaa.
Tamanna Inuit Issittormiut Siunnersuisoqatigiiffiata, ICC-p, siulersuisuisa akueriumanngilaat, ukiut arlallit ingerlanerini ilisimatuussutsikkut misissuinerit tunngavigalugit piumasaqaateqartoqarsimanera innersuussutigalugu. Misissuinerit taakkorpiaat Arfanniarnermut Ataatsimiititaliarsuup nammineq ilisimatuussutsikkut ataatsimiititaliaanit aamma akuerineqarsimapput.
ICC-ttaaq Kalaallit Nunaata nunatut arfanniartarfitoqqatut arferit angisuut neqaannik 670 tonsinik pisariaqartitsineranik akuersissuteqarsimanera Arfanniarnermut Ataatsimiititaliarsuarmi amerlanerussuteqartut akuersisimanerat innersuussutigaa.
- Kalaallit Nunaata arfattassani nammineerluni marlunnik ilagaluarpagilluunniit annertussuseq taanna anguneqarnavianngilaq. Neqit annertussusaat Arfanniarnermut Ataatsimiititaliarsuup annertussusissatut aalajangersagaanit 100 tonsinik annikinneruinnassaaq.
Taamaammat ICC isumaqarpoq Kalaallit Nunaata inatsisitigut akuerisamik piumasaqaataa Arfanniarnermut Ataatsimiititaliarsuarmit saneqqutiinnarneqartoq.
- Arfanniarnermut Ataatsimiititaliarsuarmi nunat ilaasortaasut amerlanersaasa piujuaannartitsinissaq mianersornissarlu tunngavigalugit ilisimatuussutsikkut paasisat pinnagit, uumasunik illersuiniaqatigiit paasissutissaataannik eqqunngitsunik misigisissutsinillu tunngaveqartunik upperinninnerat ajuusaarnartoq, ICC-p Kalaallit Nunaannut tapersiutaani ilaatigut allassimavoq.
