Nunatta imartaanit tunisassiat Tysklandimi politikerinut sassaalliutigineqartut
- Tysklandimi inatsisartoqarfik Deutsche Bundestag Tysklandimi sumiiffiit akimanersaraat, tamaanilu nittarsaassinissamut periarfissiisoqarsinnaanngikkaluarpoq, René Stahlhofen Royal Greenlandip Bremenimi tuniniaasarfittut allaffeqarfiani pisortaq unnersiorpoq.
- Uagulli aalisakkanik qalerualinnullu tunngatillugu suleqatigisavut Transgourmet aamma inatsisartoqarfimmut nerisassanik pilersuisartut Dussmann "Kalaallit Nunannit sammisaqartitsineq"-tut taasatsinnik ima soqutiginnilersissimatigaavut allaat inatsisartoqarfimmi nittarsaassinissatsinnut iluatsitsilluta periarfissaqalersinnaasimalluta.
Soqutiginnittut 1600-t missaaniittut Royal greenlandip tunisassiaminik nittarsaassineranut peqataapput.
"Aalisakkat Kalaallit Nunaanneersut" pillugit nittarsaassineq soqutigineqartorujussuuvoq. Amerlasuut Kalaallit Nunaat, aalisarneq, aalisakkat pissuseqatigiiaat aammalu nerisassiatut ilitsersuusiavut pillugit paaserusutaqarput, Royal Greenland nittartakkamini allaaserisaqarpoq.
Malik Hegelund Olsen Kalaallit Nunaanni tunisassianik tuniniaasarfimmi ingerlatsisuusoq nittarsaassinissamut qaaqqusaasimavoq.
- Nittarsaassinermi iliuutsit periutsillu assigiinngitsut peqataaffigineri malinnaaffiginerilu ilinniarfigalugillu isumassarsiorfigaakka. Ilikkakkat paasisallu tunngavigalugit nittarsaassineq uagut nunatsinnut tulluarsarsinnaavarput, Malik Hegelund Olsen oqarpoq.