Nunatta imartaani malerujussuit

Nunarsuup silaannaata kissatsikkiartornera Kalaallit Nunaanni sukkanerpaavoq. Nunarsuarmi Silasiornikkut Kattuffissuup nalunaarusiaani tamanna atuarneqarsinnaavoq.

Sikusarnerata annikilliartornera silaannaap kissatsikkiartorneranut pissutaanerpaavoq, Jens Hesselbjerg, Danmarkimi Silap pissusaanik ilisimatusarfimmi pisortaasoq taama oqaluttuarpoq.

Sikorpiassaarnera Kalaallit Nunaata imartaanut annertuumik sunniuteqarnera aamma erseqqissaatigaa.

- Imaannanngoraangat, sunniutaa allaanerusarpoq sakkortunerullunilu, tamannalu malerujussuaqalerneranik aamma kinguneqartarpoq. Taamaammat oqartoqarsinnaavoq, imaannaanerulerneratigut Kalaallit Nunaata imartaata angallaviginissaa ajornarnerulissasoq, Jens Hesselbjerg oqarpoq.

Kalaallit Nunaata imartaata angallavigiuminaannerulernissaa Frederik Heilmannip ilisarisinnaalluarpaa. Taanna Royal Greenlandimi umiarsuup naalagaatut sulivoq, taannalu malillugu mallertarnera allanngorsimavoq.

- Mallit siornatigumut naleqqiullugit anginerujussuupput, imaq angallavigiuminaatsupilussuulluni, umiarsuup naalagaa misilittagartooq oqarpoq.

Sikorpiassaarnerata pissutaaqataanera aamma malugisarlugu oqaatigaa.

- Malerujussuanngortarput, pingaartumik Tunumi, siornatigut tassani sikoqartupilussuusaraluarpoq, ukiormannali sikoqarpianngilaq, Frederik Heilmann naggasiivoq.