Nunatta ilusaatut katiterlugu eqqumiitsuliaq nutaamik pisoqarfiusoq
Katiterlugu ilusilersukkat nalinginnaanngitsut Københavnimi takussaasut, KNR-imit ukiup affaata matuma siorna oqaluttuaraarput.
Nunattali ilusaatut katiterlugit eqqumiitsuliat, Københavnimi illorsuarnut kimit nivinngaassorneqartarpat?
Københavnimi Kalaallit Illuutaat Danmarkimi illoqarfiit pingaarnersaanni katiterlugit assiliat pillugit arlalippassuarnit saaffigineqarpoq. Eqqumiitsuliortorli suli kinaassuserneqanngilaq. Katiterlugu assilialiat pillugit suliaq nutaamik maanna pisoqarfiuvoq, pinerluttulersaarutitullu pissanganartigaluni.
AAMMA ATUARUK Kalaallit Nunaannik eqqumiitsuliortoq kinaana?
Kalaallit Illutaata allakkap puua kajortoq, usb-mik imalik allakkanut nakkartitsivimmini nassaarisimallugu, sapaatit akunneranut alakkiamini allappoq.
Allakkap iluaniittoq tupinnarpallaanngilaq. USB-imili Københavnimi upernaaq takuneqallattaasutulli, nunatta assingata ilusaanik mikisunnguamik katiterlugu assialialiaqarpoq.
USB-p iluani nunatsinni immiussarineqarsimasut katiterlugillu assilialiat Københavnimi takussaasut isiginnaagassiamut ikkussorneqarsimapput. Københavnimi Kalaallit Illuutaat nutaarsiassiilluni taama allapoq. Video katiterlugu assilialianik eqqumiitsuliortup kinaassusaanik ersersitsinngitsoq uani takusinnaavat. Tupinnartumulli tapertaalluni: Kinaana katiterlugu assilialianik eqqumiitsuliortoq?
