Nunatta iluani angallannermi innuttaasut salliutinneqalissapput

Karsi imaaruppoq, pisortaq soraarsinneqarpoq, aningaasartuutillu annertusimaqaat. Taamaattorli Arctic Umiaq Line-p angallassinini ingerlatiinnarniarpaa, tamatumuuna innuttaasut eqqarsaatiginerullugit.

-Inunnik allanik suleqateqarnerulissaagut, Air Greenlandillu Kalaallit Nunaanni timmisartuussineq misilittagaqarfigilluarmagu ajunngilluinnartumillu ingerlallugu, taakku qanimut suleqatigilissavagut. Umiarsuarmik angallassineq eqqarsaatigalugu, innuttaasut angallanneqarnissaat aallaavigissavarput soorlu timmisartukkut aamma taamaaliussasugut. Taassuma saniatigut takornariat aamma sullisissavagut, Søren Rasmussen oqarpoq.

Arctic Travel Groupip takornarianik angallassineq sullissinerlu pingaarnerutikkunnaarlugit maanna innuttaasut sullinnerulissavaat, siullertullu malugineqartussaq tassaavoq qaammatip uumap ingerlanerani timmisartukkut billitsit massakkut akikitsuararsuusut akitsornissaat. Taassuma saniatigut Air Greenland Arctic Travel Groupilu imminnut ataqatigiittorujussuanngussapput, taamaalilluni angalaniarneq eqaannerujussuanngorlunilu ajornannignnerujussuanngussalluni. Tamannalu tamanit nuannarineqassasoq, Søren Rasmussen oqarpoq.

-Angalaneq qanoq akeqalissanersoq suli oqaatigisinnaanngilara, nalunngilarali aamma inuit angalaneq akisuallaaraangat akilerusunneq ajoraat. Tamarmi oqimaaqatigiisinniartussaavarput, angalaneq qanoq akeqarpa inuillu qanoq akileerusutsigippat, Søren Rasmusssen oqarpoq.

Narsarsuarmiit avannamut umiarsuarmik angalaneq ingerlatiinnarneqassaaq. Avannaanilu angallanneq eqqarsaatigalugu inuit najugaqarfii angallaffigineqarusuttullu pilersaarusiornermi maluginiarneqassapput, Air Greenland suleqatigilluarlugu.