Nunatta illuisa nalii TV-kkut eqqoriarneqaqattaartut
Juulli ilaquttat ilagalugit nuannaarfiusarpoq. Amerlasuunulli tv-kkut aallakaatitassianik aamma isiginnaarfiulluni.
Juullillu nalaani TV-kkut aallakaatinneqartussani, ilaatigut Nunatsinni illut akii nalilerneqartassapput. Nunarpummi DR-ip aliikkutassiaanit, Hammerslagimit aasaq tikeraarneqarpoq. Nuummiit Ilulissaniillu ilanngutassialiaq ataasinngorpat decembarip ulluisa 28-anni, nalunaaqutaq 20:30 DR1-ikkut aallakaatinneqassaaq.
- Ilumoorlunga oqassaguma; aallakaatitassiarput takusinnaassagassigit nuannaarluinnarpunga. Suliarilluagaavormi, aallakaatitsinermi ingerlatsisoq, Christian Degn e-mailikkut allappoq.
Aamma atuaruk Kaattaassineq Nunatsinni
Aallakaatitassiap danskit Nunatsinnut isiginnittaasiannut allanguinissaa, ingerlatsisup neriuutigaa. Christian Degnillu ilanngullugu oqaatigaa, Nunatsinni illut allatut isikkoqarsorisimagaluarlugit.
- Kalaallit Nunaannukalerama naatsorsuutigisimavara illut qisunnik sanaajusut, iserlugit tarrajuttut immaqalu aamma silataani puiseqartoq pisaarlaamik. Kisianni oqarusuppunga, illut maani kusanarluinnarmata assut tupallunga. Christian Degn aasaq Nunatsinniinnermini oqarpoq.
