Danmarkimi aningaasanut inatsit: Nunatta illersuisuuneranut aallarnisaasunullu aningaasaliisoqalersoq

Nunatsinni illersuisut ilinniartitaanerannut kalaallinullu Danmarkimi aallarnisaasunut amerlangaatsiartunik aningaasaliisoqartussanngorpoq. Danmarkimi 2019-imut aningaasanut inatsisissap isumaqatigiinniutigineqarneranut atatillugu tamanna pissaaq.

Danskit naalakkersuisui aappaagumut aningaasanut inatsimmi nunatsinnut kalaallinullu Danmarkimiittunut aningaasanik amerlangaatsiartunik immikkoortitsinissaminnut piareersimapput. Sermitsiaq. AG. taama allaaserisaqarpoq.

AAMMA ATUARUK Danskit aningaasanut inatsisaat nunatsinnut aningaasartaqartoq

Ilaatigut Nunatta Illersuisuuneqarfianut Nuummiittumut ukiut sisamat ingerlanerini 3,5 millionit koruuninik ilassutitut aningaasaliisoqarnissaa danskit naalakkersuisuisa kissaatigaat.

Nunatsinni eqqartuussivinni illersuisunik amerlanerusunik ilinniartitsinissamut Danmarkimi Inatsisinik atuutsitsinermut ministereqarfiup aningaasanik naammattunik immikkoortitsisimannginnera Folketingimut ilaasortanit nunatsinneersunit nunattalu illersuisuunerata Finn Meinelip arlaleriarlugu isornartorsiorneqarpoq.

AAMMA ATUARUK Illersuisuinik nutaanik ilinniartitsinissamut aningaasaqarniarneq aporfiusoq

Maannakkutummi inissisimasoqartillugu, suliat eqqartuussivinnit aalajangiiffigineqarnissaat innuttaasut sivisuupilussuarmik utaqqisariaqartarpaat.

Danskit naalakkersuisui illersuisutut ilinniartitaanermut ukiumut 1 millionit koruuninik aningaasaliiniarput.

Kalaallit aallarnisaasut aningaasaliiffigineqassasut

Danskit naalakkersuisui aamma isumaqarput kalaallit Danmarkimiittut suliffeqarfimmik aallartitserusuttut ikiorserneqartariaqartut.

Danmarkimi aallarnisaasut illuinik taaneqartartut, kalaallit inuusuttut suliffeqarfimmik aallartisaanerinut ikiuinissaannut 7,5 millionit koruuninik aningaasaliisoqarnissaa siunnersuutigineqarpoq.

AAMMA ATUARUK Hammondip Chemnitzillu aningaasanut inatsisissamut kissaatitik saqqummiukkaat

Danskit akornanni nunarput Savalimmiullu pillugit ilisimasat pitsanngorsarnissaannut 2022-p tunganut 25 millionit koruunit atorneqarnissaat danskit naalakkersuisuisa aningaasanut inatsisissatut siunnersuutaanni aamma siunnersuutigineqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat