Nunatta ilaani aatsaat taama kiatsigaaq
Tunup avannaa aatsaat taama kiatsigitillugu DMI-mit uuttorneqarpoq. Nunatta avannaarpiaani Kap Morris Jesup-imi uuttuivimmi tamanna takutinneqarpoq. Tassani juunimi agguaqatigiisillugu +1,8 grademik kiassimavoq naliginnaasumik - 1,5 grade-nik juuni pueqqortaraluartoq.
Juulimi aamma sila aatsaat taama kiatsigitillugu DMI-mi uuttorneqarpoq tassa Thule Air Base, Qaanaaq aamma Upernavik pisarnerminnit juulimi kiannerusimammata.
Aasianni silasiorfimmi aamma aappassaa taama kiatsigitillugu uuttuisoqarpoq tassa 1960-misulli agguaqatigiisillugu juulip qaammataa + 8,5 gradenik kiassimammat.
Immaqa ilaat aamma eqqarsarsinnaagaluarput aasaq pisarnermit siallerajunnerusimasoq. Nunarpulli tamaat taamaassimanngitsoq, DMI nittartakkamini allappoq. Tassamigooq Qaqortoq Tasiilarlu agguaqatigiisillugu pisarnermit panernarnerusimammata.