Assi: William Hook

Nunatta Europallu akornanni qarasaasiatigut assiaquteqalernissaa pinngitsoortikkusukkaat

Nunatsinni peqqinnissaqarfimmi kukkunermik naammattuuigaanni Danmarkimi napparsimasunut naammagittaalliuteqartarfimmut ajornanngitsumik naammagittaalliuuteqartoqarsinnaavoq. Akissuteqaatilli tigunissaanut qarasaasiatigut assiaqutaasartoq aporfiusinnaavoq.

Nunarput EU-p avataani nunatut isumannaatsutut akuerineqanngippat kalaallit napparsimasut Danmarkimi napparsimasunut maalaaruteqartarfimmut naammagittaalliuteqarnissaannut periarfissamut eqquisinnaavoq.

Tamannali digitalimik sullissinermut aqutsisoqarfiup maanna allanngortinniarsaraa, aqutsisoqarfimmili aqutsinermut pisortaagallartup, Tony Ditlevsdalip EU-mi inuit pillugit paasissutissanut peqqussut GDPR innersuussutigaa.

AAMMA ATUARUK  Norgemi isertortumik paasiniaasartut paasisaat Nunatsinni ernumassutissaanngillat

- Nunap isumaqatigiissuteqarfiup avataaniittugut napparsimasumut tunngasunik paasissutissarpassuarnik napparsimasunut maalaaruteqartarfimmut nassiusseqattaarsinnaassaagut, akissutisisinnaanaviaratali. Tamannalu nakorsiartutsinnut pitsaasuunavianngilaq.

Tony Ditlevsdalilli oqaatigaa ajornartorsiut suli annertuallaanngitsoq, oqartussat attaveqaqatigiittarnerat suli taannaammat.

- Danmarkimi malinneqarpianngilaq, piffissalli ilaani sukateringaatsiaartoqartussaassaaq, pisortaagallartoq oqarpoq.

Taamaattumik digitalimik sullissinermut aqutsisoqarfiup nunap isumaqatigiissuteqartut avataani isumannaatsutut akuerineqarnissaanut pisortatigoortumik qinnuteqaasiornissaq sulissutigaa, Tony Ditlevsdalillu taanna aasamut nassiunneqarnissaa naatsorsuutigaa.

Nunarput nunat isumaqatigiissuteqartut avataaniittutut isumannaatsutut akuerineqassappat nunatta EU-milu nunat ilaasortaasut allat akornanni paasissutissanik sukkanerusumik paarlaasseqatigiittoqarsinnaalernissaanik kinguneqassaaq. Aammattaaq nunat killiit illersoqatigiiffiannut Natomut qarasaasiatigut isumannaallisaaneq pillugu suleqatigiittoqarsinnaalissaaq.

AAMMA ATUARUK Norgemiut qaraasiakkut attaveqaataannik Kinamiut Ruslandimiullu saassussisinnaanerat aarlerisaarutigineqartoq

Nunat isumaqatigiissuteqartut avataaniittutut isumannaatsutut akuerineqaraanni kingunerissavaa EU-p sinneranut suleqatigiinnerup akimmiffeqannginnerulluni sillimanikkullu oqinnerulerluni ingerlanissaanik. Qularnanngitsumillu tunniussisinnaanissatsinnut apeqqusiisoqarpallaarnavianngilaq, tassa imaappoq inuussutissarsiornikkut allatigullu ajornannginnerusumik ingerlatitseqqittoqarsinnaalissalluni.

Savalimmiut isumaqatigiissuteqartut avataaniittutut ukiuni arfineq-marlunni akueriniarneqareerluni 2010-mi akuerineqarpoq. Aammattaaq Norge Islandilu, EU-mi ilaasortaanngitsut nunat isumaqatigiissuteqartut avataanni isumannaatsutut akuerineqarsimapput.

Nunatsinnut tamanna sukkasinnaasoq, Tony Ditlevsdalip nalilerpaa piffissarli aalajangersimasoq oqaatiginagu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat